TMD elderi arasynda ótken alǵashqy áskerı-sport oıyndarynda úshinshi oryndy jeńip aldy
Máskeýde ótip jatqan TMD elderi arasyndaǵy Birinshi áskerı-sport oıyndary óz máresine jetti. Qazaqstan armııasynyń qurama komandasy jarysta úshinshi oryndy ıelendi. Bizdiń áskerıler barlyǵy 47 medalǵa, atap aıtsaq, 7 altyn, 16 kúmis jáne 24 qola jeńip alyp, Qyrǵyzstan, Tájikstan jáne Armenııa sportshylaryn artta qaldyrdy.
Alǵashqy áskerı-sport oıyndarynda Qazaqstannyń atynan Qorǵanys mınıstrligi Armııanyń ortalyq sport klýbynyń ataqty áskerı sportshylary shyqty. Sýda júzý, dzıýdo, qoıan-qoltyq kúres, gir sporty, ofıserlik úshsaıys jáne shtattyq qarýdan oq atý boıynsha saıysqa túsken bizdiń sarbazdar júldeli oryndardy jeńip aldy.
Jarysqa alty elden barlyǵy 300-den astam áskerı qyzmetshi qatysty. Birinshi oryndy Reseıdiń atletteri, al ekinshi oryndy – Belorýssııa armııasynyń quramasy jeńip aldy. 1 tamyz kúni Halyqaralyq armııalyq oıyndar bas-talatynyn aıta ketken jón. Qazaqstan osy aýqymdy shara aıasynda úsh túrli saıysqa qatysady. Atap aıtqanda, olar «Tank bıatlony», «Avıadarts» jáne «Kaspıı teńizi» (teńiz bıatlony).
Aǵymdaǵy jyldyń 1-15 tamyzy aralyǵynda bizdiń 20 tankishi Máskeý oblysyna qarasty «Alabıno» polıgonynda ótetin 13 memleket ókilderimen birge sheberlikterin synaıdy. Dál osy ýaqytta Rıazan, Syzran jáne Lıpesk qalalarynyń áýe aılaqtarynda Mıg-29, Sý-25, Sý-27 jáne Mı-8 qazaqstandyq ushý ekıpajdarynyń qatysýymen «Avıadarts» óristetiledi. Al Reseıdiń Kaspııdegi akvatorııalarynda bul sátte «Saryarqa» jáne «Oral» zymyrandy-artıllerııalyq kemelerinde Qazaqstan Qarýly Kúshteri Áskerı-teńiz kúshteriniń áskerı teńizshileri men «Batys» óńirlik qolbasshylyǵynyń teńiz jaıaý áskerlerinen quralǵan brıgadasy teńiz bıatlonynyń júldeli oryndary úshin saıysqa túsetin bolady.
«Egemen-aqparat».