23 sáýir - Qazaqstanda alǵash ret Ulttyq kitap kúni atap ótilip jatyr. Bul kún byltyrǵy jyly Memleket basshysynyń bastamasymen Ulttyq quryltaıda bekitildi. Prezıdenttiń aıtýynsha, kitap - ulttyń ıntellektýaldyq jáne mádenı progresiniń negizi. Sondyqtan, eldegi ádebı murany saqtaý jáne damytý maqsatynda otandyq avtorlardyń 100 eń tanymal kitaby týraly jalpyulttyq saýalnama júrgiziledi, dep habarlaıdy Egemen.kz.
Saýalnamanyń basty maqsaty - qazaqstandyq jazýshylardyń shyǵarmalaryn nasıhattaý, oqýǵa degen qyzyǵýshylyqty arttyrý jáne baspa isin qoldaý. Bul halyqtyń kitap oqýǵa degen qyzyǵýshylyǵyn arttyryp, otandyq ádebıetti damytýǵa úles qosady.
«Memleket basshysy Qasym-Jomart Kemeluly Toqaev byltyr Ulttyq quryltaıdyń otyrysynda «Ulttyq kitap kúnin» belgileý ıdeıasyn qoldady. Prezıdent: «Ozyq oıly ult bolýdyń eń tóte joly – kitap oqý. Sondyqtan kitap oqý mádenıetin qoǵamda barynsha ornyqtyrýymyz kerek», – dep aıtqan edi. Búgin biz alǵash ret «Ulttyq kitap kúnin» atap ótip otyrmyz. Osynaý aıtýly kúni tól ádebıetimizdegi 100 tańdaýly kitapty aıqyndaýǵa arnalǵan jalpyulttyq saýalnama bastaldy. Bul tizim kitap oqýǵa degen qyzyǵýshylyqty arttyrady jáne ádebıetimizdi damytýǵa yqpal etedi dep oılaımyn», dedi QR Memlekettik keńesshisi Erlan Qarın
Saýalnama «Elektrondy úkimet» ınfraqurylymy arqyly ótkiziledi. EGov.kz resmı saıtynda saýalnama júrgizý úshin arnaıy forma ornalastyrylǵan, onda ár azamat súıikti qazaqstandyq jazýshysynyń shyǵarmalaryn tańdaı alady.
Qatysýshylar prozadan bastap poezııa, fantastıka, pýblısıstıka jáne tarıhı romandarǵa deıin ártúrli janrlarda 10 kitapty tańdaı alady. Sonymen qatar, qatysýshylarǵa yntalandyrý syılyqtary qarastyrylǵan. Alǵashqy 1000 qatysýshyǵa Meloman-Marwin jelisinen kitap jáne arnaıy nomınasııalar boıynsha qosymsha syılyqtar beriledi.
Aıta keteıik, saýalnama 3 aı boıy jalǵasady, osy ýaqyt aralyǵynda qazaqstandyq ádebıet týraly keń aýqymdy pikirler qalyptasady. Saýalnama nátıjeleri 10 tamyzda jarııalanady, bul kúni Abaı kúnin atap ótýmen birge, oqýǵa degen qyzyǵýshylyqty arttyrýǵa jáne ulttyq ádebıetti damytýǵa jańa qadam bolady.
Bul joba Ulttyq quryltaıdyń bastamasymen júzege asyrylyp otyr.
Ulttyq kitap kúni - tek merekelik kún ǵana emes, qoǵamymyzdyń damýyna baǵyttalǵan mańyzdy baǵdar. Álemdegi qysqa merzimdi trendterge qaramastan, oqý mádenıetin damytýdy erekshe atap kórsetý - bolashaqqa arnalǵan mańyzdy qadam. Bilimniń kózi ǵana emes, sondaı-aq qundylyqtardyń joly bolǵan kitaptar, bizdiń bolashaǵymyzdy nyǵaıtýǵa yqpal etedi.
Búginde Uly Abaıdyń «Artyq bilim kitapta, erinbeı oqyp kórýge» degen sózderi óte ózekti. Álemdik aqparattyq tolqynda shynaıy mańyzdy nárselerdi umytpaý úshin kitap oqý qajet. Kitap kúni – bul bizge jáne balalarymyzǵa kitaptyń tek bilimniń kózi ǵana emes, sonymen qatar qundylyqtarymyzdy kórsetý quraly ekendigin eske salatyn múmkindik.