IIM-ne qarasty Ulttyq ulan áskerlerin daıarlaýdyń 2025 jylǵa arnalǵan josparyna sáıkes 6654 oqý brıgadasynda quqyqtyq tártip áskeriniń orta medısınalyq personalynyń biliktiligin arttyrý boıynsha oqý-ádistemelik jıyn ótti, dep habarlaıdy Egemen.kz Ulttyq ulannyń baspasóz qyzmetine silteme jasap.
Buǵan deıin Ulttyq ulanda taktıkalyq medısına boıynsha hattama ázirleý jáne bekitý týraly bastama kóterilgenin, sondaı-aq telemedısınany damytý usynylǵanyn atap ótken jón.
Oqý jıyny aıasynda epıdemıologııa, alǵashqy medısınalyq kómek kórsetý, medısınalyq qamtamasyz etýdi uıymdastyrý jáne taktıkalyq medısına boıynsha praktıkalyq sabaqtarǵa erekshe nazar aýdaryldy. Oqytýdyń bul baǵyty 2025 jyly Ulttyq ulan júıesinde taktıkalyq medısına qyzmetiniń qurylýyna tikeleı baılanysty boldy.
Bul qyzmettiń maqsaty – jeke quramdy jaýyngerlik jaǵdaılarda medısınalyq kómek kórsetý jónindegi is-qımyldarǵa oqytý bolyp tabylady.
Taktıkalyq medısına boıynsha sabaqtardyń tájirıbelik bóligi 6654 áskerı bóliminiń oqý ortalyǵynda «Búrkit» arnaıy maqsattaǵy bólimshesi nusqaýshylarynyń qatysýymen ótti. Shynaıy oqıǵalarǵa barynsha jaqyn jaǵdaılarda áskerı qyzmetshiler shuǵyl kómek kórsetý, gemostatıkalyq týrnıketter salý daǵdylaryn, jaralylardy tasymaldaý jáne evakýasııalaý tásilderin pysyqtady.
«Tótenshe jaǵdaılarda alǵashqy kómek kórsetý boıynsha ádistemelik daıyndyq jeke quramda psıhologııalyq turaqtylyqty qalyptastyrýǵa, ózin-ózi ustaı bilýge jáne stress pen jaýyngerlik faktorlardyń áserinen tıimdi áreket ete bilýge kómektesedi. Sonymen qatar, jaýyngerlik shyǵyndardy azaıtýǵa yqpal etedi», deıdi Ulttyq ulan Áskerı-medısınalyq basqarmasynyń bastyǵy Talǵat Sydyrmanov.
Taktıkalyq daıyndyqtan basqa, jıyn sheńberinde obektilerdiń sanıtarlyq jaı-kúıin medısınalyq baqylaý, dári-dármektermen jumys isteý tártibi, jaýyngerlik kezekshilik kezinde medısınalyq kómekti uıymdastyrý, sanıtarlyq óńdeý, ınfeksııalar men tamaqtan ýlanýdyń aldyn alý, sondaı-aq jaralar men qan ketýler kezinde alǵashqy kómek kórsetý boıynsha teorııalyq jáne praktıkalyq sabaqtar ótti.
Aıta ketken jón, mundaı jıyndardy ótkizý Ulttyq ulan jeke quramynyń medısınalyq daıarlyǵynyń joǵary deńgeıin ustap turýda mańyzdy ról atqarady jáne áskerı qyzmetshilerdiń densaýlyǵy men jaýyngerlik daıyndyǵyn qamtamasyz etýge eleýli úles qosady.