Memleket basshysy Qasym-Jomart Toqaev Qazaqstan halqy Assambleıasynyń XXXIV sessııasynda sóz sóılep, eldegi etnosaralyq kelisimdi nyǵaıtýǵa baǵyttalǵan birqatar mańyzdy bastamalardy jarııalady, dep habarlaıdy Egemen.kz.
Prezıdent aldymen Qazaqstan halqy Assambleıasynyń aımaqtardaǵy jumysyn kúsheıtý qajet ekenin atap ótti. Ol byltyr Túrkistan qalasynda jańa Dostyq úıi ashylǵanyn tilge tıek etip, dál osyndaı ortalyqty halyq tyǵyz qonystanǵan Almaty oblysynda da salýdy usyndy. Memleket basshysynyń aıtýynsha, bul ǵımarat óńirdiń qoǵamdyq ómiriniń mańyzdy ortalyǵyna aınalýy tıis.
Sonymen qatar Qordaı, Uıǵyr, Saıram, Panfılov jáne basqa da etnosaralyq qatynastar belsendi damyp jatqan aýdandarda Assambleıa bólimshelerin ashý qajettigin aıtty. Dostyq úıleri aldaǵy ýaqytta basqa da qala jáne aýdan ortalyqtarynda da ashylmaq.
«Men bul bastamany qoldaımyn. Biz qoǵamdyq kelisim ınfraqurylymyn birtindep keńeıte berýimiz kerek», Memleket basshysy.
Prezıdent sonymen qatar barlyq óńirlerdegi Dostyq úılerin týrıstik baǵyttar kartasyna engizý qajet ekenin atap ótti. Bul oryndar elimizdiń azamattary úshin ǵana emes, sheteldik qonaqtar úshin de tartymdy bolýy tıis.
«Barlyq aımaqtaǵy Dostyq úılerin óz azamattarymyz da, qajet bolyp jatsa, sheteldik qonaqtar da baratyn týrıstik baǵyttar kartasyna engizgen jón. Quzyrly organ basshylary men ákimder Assambleıanyń etnomedıasııa salasyndaǵy jumysyna jan-jaqty qoldaý kórsetýge tıis. «Eldesý jáne tatýlasý» jobasynyń aýqymyn keńeıtip, ony aldaǵy eki jylda búkil elge taratý qajet», dedi Qasym-Jomart Toqaev.
Sondaı-aq, Úkimet pen jergilikti ákimdikterge Assambleıanyń basqa da jobalaryn qoǵamdyq-saıası jumys josparlaryna engizip, naqty sharalar qabyldaý tapsyryldy.
Memleket basshysy sessııa barysynda aqparattyq keńistikte etnosaralyq birlik pen kelisimdi nasıhattaýdyń mańyzdylyǵyna da erekshe toqtaldy. Onyń aıtýynsha, bul Assambleıa qurylymdarynyń, ásirese, jýrnalıster klýbynyń basty mindetteriniń biri bolýy tıis. Salalyq mınıstrlikter men óńir ákimderi QHA jýrnalıster klýbynyń quramyna jetekshi buqaralyq aqparat quraldarynyń ókilderin qosyp, klýb jumysynyń biryńǵaı algorıtmin ázirleýi qajet.
Prezıdent sondaı-aq, etnostardyń ana tilinde jaryq kóretin óńirlik buqaralyq aqparat quraldaryn júıeli túrde qoldaý kerek ekenin aıtty. Bul sharalar etnosaralyq kelisimdi nyǵaıtyp, mádenı áralýandyqty saqtaýǵa múmkindik beredi.
Sonymen qatar Qasym-Jomart Toqaev «Birligimiz – áralýandyqta» qaǵıdatyn júzege asyrý úshin mádenıet pen ónerdiń áleýetin barynsha paıdalanýdyń mańyzdylyǵyna toqtaldy. Ol Qazaqstanda Aleksandr Pýshkın, Taras Shevchenko, Fedor Dostoevskıı, Mıhaıl Sholohov syndy álemdik deńgeıdegi tulǵalarǵa arnalǵan mýzeılerdiń jumys isteıtinin, olardyń el mádenıetiniń baǵa jetpes bólikteri ekenin aıtty.
Prezıdent bul mýzeılerdiń kórmelerin Astana, Almaty jáne basqa qalalarda uıymdastyryp, keńinen nasıhattaý qajet ekenin usyndy. Sonymen qatar, keıbir etnomádenı birlestikterdiń jınaǵan etnografııalyq jáne óner týyndylarynyń jeke kolleksııalary da Qazaqstannyń mádenı murasyna aınalýy tıis.
«Keıbir etnomádenı birlestikter biregeı óner jáne etnografııalyq jeke kolleksııalardy jınady. Bul da elimizdiń mádenı murasyna aınalýǵa tıis. Qazaqstanda 9 orys drama teatry tabysty jumys istep jatyr. Sondaı-aq erekshe tórt etnos teatry, ıaǵnı, uıǵyr, koreı, ózbek jáne nemis teatrlary kórermenniń kózaıymy bolyp júr. Assambleıanyń 30 jyldyǵy aıasynda Almatyda báriniń basyn qosyp, Qazaqstan etnostary teatr óneriniń festıvalin ótkizsek bolady. Halyq kóp keledi dep oılaımyn», dedi Memleket basshysy.