Tamam jurtqa tanymal talantty jýrnalıst Maııa Bekbaevanyń ultqa qyzmet etýdi kózdegen berik ustanymy bek unaıdy. Qazaqtyń qıly tarıhyn qozǵaǵan, tuǵyry bıik tulǵalarymyzdyń taǵdyry týraly tereńnen tolǵaǵan tushymdy televızııalyq týyndylary kókiregi oıaý kórermenniń kózaıymyna aınalǵaly qashan.
Alashqa aty ketken jaqsy-jaısańdarymyz jaıyndaǵy júzdegen derekti fılmin kógildir ekrannan kórip, kóńil kónshitkenimizdi atap ótýdiń artyqtyǵy joq sııaqty. Eń bastysy, avtor bul baǵytta júıeli túrde jumys istep keledi. Sonyń arqasynda arǵy-bergi zamandardaǵy mańdaıǵa basar marǵasqalarymyzdyń ómirindegi ózimiz biletin jáne bilmeıtin biraz jaıǵa qanyqtyq. О́zge áriptesterimizge úlgi-ónege etýge laıyq bul úzdik úrdis aldaǵy ýaqyttarda da jalǵasady degen úmittemiz.
Bizdi Maııanyń aqparat aıdynyndaǵy ámbebaptyǵy eriksiz tánti etedi. Júırik jýrnalıstigine rejısserligi men prodıýserligi, áleýmetti baýrar ártistigi qosylyp qaryndasymyzdyń qabilet-qarymyn aıshyqtaı túskendeı.
Belgili Bekbaevanyń keıingi kezderi jazba jýrnalıstıkanyń da aýylyna at arqandap, tarıhı-tanymdyq týyndylarǵa bet burǵanyn jaqsylyqtyń belgisi retinde qabyldaǵanymyz jón... Baǵaly bastamanyń alǵashqy joralǵysy retinde Joshy han haqyndaǵy eleýli eńbegi jaqynda oqyrmanǵa jol tartqanynan habardarmyz.
Elordany eleńdetken «Astana Eyrasian Book Fair-2025» halyqaralyq kórme-jármeńkesi aıasynda onyń qazaq jáne orys tilderinde shyqqan «Qazaqstan: jeńiske qosqan úlesi. 1941–1945» atty albom-kitabynyń betashar rásimi boldy. Avtordyń aıtýynsha «Bul kitap Otanyn qorǵaǵan, tylda eńbek etken, bolashaq urpaq úshin ózderin qurban etken batyrlarǵa arnalǵan estelik».
Adamzat tarıhyndaǵy eń alapat qyrǵyn – Ekinshi dúnıejúzilik soǵysqa qazaqstandyqtardyń qatysýy – taýsylmaıtyn taqyryp. Qanshama kıno túsirilip, ádebı-kórkem shyǵarmalar jazyldy. Esebine jetý esh múmkin emes. Maııanyń myna kitaby da telegeı teńizge qosylǵan bir tamshydaı tábárik dúnıe ekeni talassyz.
Munda negizinen keshegi kúndeı kúrkirep ótken surapyl soǵystaǵy jerlesterimizdiń óshpes erligi baıandalady. Naqtylaı tússek, el basyna ekitalaı kún týǵanda qaısarlyq pen qaharmandyqtyń qaıtalanbas úlgisin kórsetken Baýyrjan Momyshuly, Álııa Moldaǵulova, Raqymjan Qoshqarbaev, Mánshúk Mámetova, Málik Ǵabdýllın, Hıýaz Dospanova, Qasym Qaısenov, Talǵat Bıgeldınov sekildi batyrlarymyzdyń ónegeli ómir joldary pýblısıstıkalyq pafospen óriledi. Derekter men dáıekter, sırek kezdesetin sýretter, maıdannan joldanǵan mándi hattar kitap qundylyǵyn arttyryp turǵany anyq.
Aıtpaqshy, atalǵan kitap «Arman – pv» baspasy» Maııa Bekbaevamen birlesip qolǵa alǵan «Tarıh taǵylymy» jobasy aıasynda jaryq kórip otyr. Ideıa avtory – osy baspanyń bas dırektory Dıdara Alına.