«Atyraý munaı óńdeý zaýyty» JShS-niń baspasóz qyzmetinen málim etkendeı, 1 mamyrdan bastap kómirsýtekti shıkizatty óńdeý tarıfi tómendetiledi, dep habarlaıdy Egemen.kz.
«Jańa tarıf qosylǵan qun salyǵyn esepke almaǵanda, bir tonna úshin 47 myń teńgeni quraıdy. Bul burynǵy tarıften 7 myń 450 teńgege arzan. Buǵan deıin tarıf bir tonna úshin 54 myń 450 teńge bolǵan edi», dep habarlady zaýyttyń baspasóz qyzmeti.
Tarıfti tómendetýdiń qandaı tıimdiligi bar? Birinshiden, mundaı sheshim munaı óndirýshi kompanııalardyń tabysyn teńestirý úshin qabyldanyp otyr. Ekinshiden, bul elimizdegi barlyq munaı óńdeý zaýytyna munaı jetkizýshiler úshin birdeı jaǵdaı jasaýǵa ári ekonomıkalyq ahýaldy teńestirýge yqpal etedi. Úshinshiden, ishki naryqtaǵy munaı ónimderin odan ári nyǵaıtýǵa jol ashady.
«Tarıftiń tómendeýi Atyraý munaı óńdeý zaýytynyń kredıttik mindettemelerin óteý kestesin ońtaılandyrý nátıjesinde múmkin boldy. Zaýyt turaqty damý baǵytyn berik ustanyp, ashyqtyq formatyndaǵy qyzmetin júzege asyrady. Memlekettik organdarmen, saladaǵy seriktes kompanııalarmen tyǵyz baılanysta jumys isteýdi jalǵastyra beredi», dep málimdedi baspasóz qyzmetinen.