Myńdaǵan «QTJ» UK» AQ qyzmetkerleri turatyn «Saran» shaǵyn aýdanynda Kólik qyzmetkerleri kúni qarsańynda 240 oryndyq balalar baqshasy ashyldy. Ol Memleket basshysynyń tapsyrmasymen salynǵan bolatyn.
– Búgin «Saranda» aıtýly da mańyzdy oqıǵa bolyp jatyr. Ol – Elbasymyz Nursultan Nazarbaevtyń tapsyrmasy boıynsha salynǵan zamanaýı balabaqshanyń ashylýy. Biregeı qurylys qazirgi mektep jasyna deıingi balalarǵa arnalǵan mekemelerdiń halyqaralyq úlgidegi barlyq talaptaryn eskere otyryp salynǵan, – dedi balabaqshanyń ashylý saltanatynda sóz sóılegen «QTJ» UK» AQ vıse-prezıdenti Berik Kamalıev.
Budan keıin sóz alǵan sala ardagerleri Bertran Rýbenshteın men Marat Hamzın, Astana qalalyq bilim departamenti meńgerýshisiniń mindetin atqarýshy Baǵlan Smataeva búldirshinderge aq jol tiledi. Ata-analar atynan sóz sóılegen Magıstraldyq jeli dıreksııasynyń menedjeri Altynaı Nysanbaeva qurylysty júrgizgen kásiporyn men oǵan tapsyrys bergen Ulttyq kompanııa basshylaryna alǵysyn bildirdi.
Aıta ketý kerek, balalar baqshasy sońǵy úlgidegi talaptarǵa tolyq saı keledi. Jap-jańa eki qabatty ǵımaratta ártúrli jas aıyrmashylyǵy bar toptarda jıyrma baladan tárbıelenedi. Olardyń jatyn oryndary men tárbıelenetin zaldary ınteraktıvti taqtalarmen jaraqtanǵan. Basseın, mýzyka jáne gımnastıka zaldary, medısınalyq qyzmet kórsetý bólmeleri bar. Ár topqa arnalǵan sporttyq jáne oıyn alańdarymen qamtylǵan.
Balabaqsha eden arqyly jylytylady. Aqyldy «jaryq» quraldary bar. Shkaftarda kıimder men aıaq kıimderdi keptirýge bolady. Tamaqtaný jáne kir jýý bólmeleri sońǵy úlgidegi qondyrǵylarmen jabdyqtalǵan. Salalyq áleýmettik mańyzy zor bul nysan Astanadaǵy balabaqsha kezegin de azaıta túsedi.
«Egemen-aqparat».