Elordada shyǵarmashylyq baǵyttaǵy bilimdi damytý jáne mádenıet pen óner salasynda kadrlar daıarlaý máseleleri boıynsha saraptamalyq kezdesý ótti.
Is-sharaǵa Mádenıet jáne aqparat vıse-mınıstri Aıbek Sydyqov, shyǵarmashylyq mektepterdiń, kolledjder men joǵary oqý oryndarynyń basshylary, sondaı-aq birqatar sheteldik jáne otandyq sarapshylar qatysty.
Kezdesý barysynda elimizdegi shyǵarmashylyq baǵyttaǵy bilimdi odan ári damytý, negizgi úrdister men baǵyttar talqylandy. Sonymen qatar qatysýshylar sertıfıkattalǵan bilim baǵdarlamalaryn engizý, jasandy ıntellekt dáýirindegi mádenı bilimniń rólin, shyǵarmashylyq baǵyttaǵy joǵary oqý oryndarynyń «Erasmus+» baǵdarlamasyna qatysý múmkindikteri sóz boldy. Jıyn sońynda qatysýshylar keshendi is-sharalardy ázirleý jáne ozyq tájirıbeler men suranystaǵy baǵdarlamalardy beıimdeý qajettigi týraly ortaq pikir bildirdi.
Is-sharada ónertaný ǵylymdarynyń doktory, Gnesınder atyndaǵy mýzyka akademııasynyń professory Dına Kırnarskaıa shyǵarmashylyq bilimdi damytýdyń zamanaýı trendteri jóninde aıtyp ótti. Al Nıý-Iork kıno akademııasynyń prezıdenti Maıkl Iаng sertıfıkattalǵan bilim baǵdarlamalaryn iske asyrýdyń múmkindikteri men keleshegi týraly oıyn ortaǵa saldy.
Y.Altynsarın atyndaǵy Ulttyq bilim akademııasynyń vıse-prezıdenti Rýslan Qaratabanov bilim salasynda bir maqsatqa jumylýdyń mańyzyn atap ótti.
«Eń basty qaǵıdattarymyz, tehnologııalarymyz bir bolsa, sonda ultqa da qyzmet etetin, óz mádenıetin, óz talantyn shyńdaǵan tabysty tulǵalardy shyǵarýǵa ábden qaýqarly elge aınalamyz. Ekinshiden, elimiz qazir HHI ǵasyrda, qarqyndy damyp keledi. Bul ǵasyrdyń eń basty trendteriniń biri – kreatıvti ındýstrııanyń damýy. Endi kreatıvti ındýstrııanyń aýqymyn kórsetý úshin aıtalyq, bir ǵana Dımash Qudaıbergen – eń keminde 500 adamǵa jumys berip otyr. Mine, sondaı ónerpazdar kóp bolsa, bizdiń elge keletin adamdar da artar edi. Munyń ózi – ekonomıka damýynyń kórsetkishi. Sonymen qosa elimizdegi úzdiksiz bilim júıesin odan ári jetildirýimiz kerek. Máselen, balabaqsha men mektepterdegi úıirmelerdiń jetekshileri, kolledjder men ýnıversıtet ókilderi bar, árqaısymyzdyń istep otyrǵan isimiz bir bolǵanymen, baılanysymyz máz emes. Sondyqtan birizdilikti qalyptastyryp, ortaq múddege qyzmet etýimiz kerek», dedi ol.
Aıta keteıik, búginde mınıstrliktiń qaramaǵynda 10 shyǵarmashylyq bilim uıymy – 4 JOO, 4 kolledj jáne daryndy balalarǵa arnalǵan 2 mektep-ınternat bar. Olarda 10 myńnan astam adam oqıdy jáne 4 myńnan astam pedagog pen qyzmetker jumys isteıdi. Oqý oryndaryna konkýrs orta eseppen bir orynǵa 9 úmitkerden keledi.