«Jetisý» Fılıppın elinde voleıboldan áıelder komandalary arasynda ótken Azııanyń Chempıondar lıgasynda top jardy, dep habarlaıdy Egemen.kz.
Fınalda taldyqorǵandyq sportshylar vetnamdyq «Bın Den Long» komandasyn 3:1 esebinen utyp, óz tarıhynda tuńǵysh ret Azııa Chempıondar lıgasynyń altyn medaline qol jetkizdi.
Eske salsaq, «Jetisý» komandasy buǵan deıin Azııanyń klýbtyq Chempıondar lıgasyna toǵyz ret qatysyp, eki márte – 2010 jáne 2013 jyldary kúmis medal alǵan bolatyn. Al bıylǵy chempıonatta altynnan alqa taǵyp, osylaısha jetisýlyq komanda aldaǵy qyrkúıekte Taılandta ótetin klýbtyq Álem chempıonatyna joldama aldy.
Atap ótsek, Azııa Chempıondar lıgasyna Qazaqstan, Taıland, Fılıppın, Qytaı, Vetnam, Qytaı, Gonkong, Iordanııa jáne Irannyń úzdik áıelder klýbtary qatysqan bolatyn.