Astanada aýqymdy ekofestıval ótip, «Taza Qazaqstan» ekologııalyq mádenıetti damytý tujyrymdamasynyń qorytyndysy shyqqany belgili. Soǵan sáıkes, ekologııalyq bastamaǵa osy kúnge deıin qatysqandardyń sany 6 mıllıon adamnan asty. Bul degenińiz, árbir úshinshi otandasymyz tazalyq saqtaýǵa úndeıtin bastamadan qur qalmady degen sóz.
«Taza Qazaqstan» respýblıkalyq ekologııalyq aksııasy byltyr 8 sáýirde bastaldy. Sodan beride óńirlerde «Taza ólke», «Kıeli meken», «Jasyl aımaq», «О́negeli urpaq», «Móldir bulaq» syndy aksııalar dástúrli túrde ótip keledi. Túrli is-sharalardyń barysynda turǵyndar 1,8 mln gektar aýmaqty kúl-qoqystan tazartty, 1,6 mıllıonǵa jýyq tal-daraq otyrǵyzdy. 5 myńnan astam tarıhı-mádenı mura obektileri qalpyna keltirildi. О́zen-kólderdiń, basqa da sý arnalarynyń 5,8 mln sharshy metrden astam aýmaǵy qoqystan tazartyldy. Ekologııalyq aksııadan qur qalmaı, óz aýlasyn tazalaýǵa shyqqan turǵyndar búginge deıin shamamen 1,1 mln tonna qoqys shyǵarǵan.
Kún raıy jylynǵaly beri elimizdiń bas qalasynda abattandyrý, kógaldandyrý jumystary qyza túsken. Elordalyqtar jyl sońyna deıin mıllıonǵa jýyq tal-daraq, kóshet otyrǵyzýdy josparlap otyr. О́tken aptada «Taza Qazaqstan. Astana – tazalyq pen tártiptiń úlgisi» ekologııalyq aksııasy aıasynda aýqymdy jalpyqalalyq senbilik ótti. Oǵan 100 myńnan astam qala turǵyny, eńbek ujymdary, memlekettik organdardyń qyzmetkerleri, bıznes ókilderi, sportshylar, mádenıet qaıratkerleri, qoǵam qaıratkerleri, máslıhat depýtattary qatysty. Senbilik barysynda 12 myńnan astam aǵash otyrǵyzylyp, 16 myń sharshy metrden astam aýmaq abattandyryldy. Ekoaksııa barysynda 400 tonnaǵa jýyq qoqys shyǵaryldy. Bul 100-den astam aýyr júk kóliginiń reısine teń.
Jyl basynan beri qaladaǵy Aqbulaq ózeniniń jaǵalaýy, R.Qoshqarbaev dańǵyly men S.Nurmaǵanbetov kósheleriniń qıylysy, J.Omarov kóshesi, Abaı dańǵyly, Sh.Ýálıhanov kóshesi, Kırpıchnyı turǵyn alaby, sondaı-aq Kereı, Jánibek handar, Uly dala kósheleriniń boıy, Beıbitshilik, Kúmisbekov, Serkebaev kósheleriniń boıy, Jaǵalaý saıabaǵynyń aýmaǵy tazalanǵan. «Jastar» saıabaǵynda, Botanıkalyq baqta, Kóktal saıabaǵynda, Abaı alańynda, basqa da qoǵamdyq oryndarda kóptep kóshet otyrǵyzylǵan.
О́tken senbide ekologııalyq aksııaǵa qalanyń barlyq alty aýdany jumyldy. Abattandyrý jumystarynan Baıqońyr aýdanynyń turǵyndary da qarap qalmady. Olar qala ortalyǵyndaǵy Táshenov kóshesiniń boıyna, Esil ózeniniń jaǵalaýyna 500 túp aǵash otyrǵyzdy.
«Búgin biz abattandyrýǵa shyqqan aýmaqty qalanyń qaq ortasy dep aıtsaq boldy. Sebebi munda Esil ózeniniń jaǵalaýy bar. Sol sııaqty Aqbulaq ózeni aǵyp jatyr. О́zen jaǵasy salamatty ómir saltyn ustanatyn qala turǵyndarynyń jıi qatynaıtyn aýmaǵy. Kesh aýa jastar kóp keledi. Osyny eskere kele, biz 500 túp aǵash otyrǵyzýdy uıǵardyq. Olardyń arasynda qylqan japyraqty aǵashtardan shyrsha, qaraǵaı, qaıyń ákeldik. 100 túp alma, almurt aǵashtary bar. Jalpy, aýdanymyzda aǵash otyrǵyzý jumysyn mamyrdyń birinshi onkúndigine deıin aıaqtaýdy josparlap otyrmyz», deıdi Baıqońyr aýdanynyń ákimi Talǵat Rahmanberdi.
Ekologııalyq aksııa aıasynda qala turǵyndary, eńbek ujymdary óz aýlalaryn ǵana emes, qaladaǵy aryqtardy, kóshelerdi, trotýarlardy, qoǵamdyq oryndardy da tazalýǵa kirisken. Kóshet otyrǵyzý, ony kútip ustaý jónindegi maýsymdyq agrotehnıkalyq jumystar qaýyrt júrip jatyr. Saýda alańdary tazaryp, ruqsat etilmegen úıindiler shyǵarylǵan. Merdiger uıymdar shaǵyn sáýlet nysandaryn, eskertkishter men sáýlet nysandaryn, qoqys oryndary men konteınerlerdi jýyp, qalpyna keltirgen. Bul Astana qalasynda iske asyp jatqan qyrýar jumystyń bir bóligi ǵana. Tazalyqqa, qorshaǵan ortany, tabıǵatty aıalaýǵa shaqyratyn ekologııalyq aksııaǵa elimizdiń ózge de óńirleri belsendi qatysty.