Byltyr óndiris kezindegi jazataıym oqıǵadan 1048 jumysker zardap shegip, 202 adam qaıtys boldy. Eńbek jáne halyqty áleýmettik qorǵaý mınıstrliginiń Memlekettik eńbek ınspeksııasy komıtetiniń málimetinshe, óndiris oryndaryndaǵy jaraqat alý deregi 2023 jylmen salystyrǵanda 4,5%-ǵa tómendegen.
Elimizdiń óndiristik aımaqtarynda jumyskerlerdiń jaraqat alý oqıǵasy jıi tirkeledi. Máselen, Qaraǵandy oblysynda – 159, ShQO-da – 124, Pavlodar oblysynda – 112, Abaı oblysynda – 101, Qostanaı oblysynda – 91, Almaty qalasynda 116 adam zardap shekken. Taý-ken metallýrgııa ónerkásibinde (18,3%), odan keıin qurylys salasynda (10,1%) jumyskerlerdiń oqys oqıǵaǵa ushyraý faktisi jıi. Qyzmetkerlerdiń jumys ústinde arandaýynyń basym kópshiligi óndiristegi jumystyń tıisti deńgeıde uıymdastyrylmaýy (35,5%), japa shegýshiniń óreskel qamsyzdyǵy (31%), jol qozǵalysy erejeleriniń buzylýy (8,2%), eńbek qaýipsizdigi men eńbekti qorǵaý erejelerin saqtamaýdan (7,6%) týyndaǵan.
Bes jylda memlekettik organdar men jumys berýshilerdiń eńbekti qorǵaýǵa qatysty júzege asyrǵan keshendi sharalardyń nátıjesinde azamattardyń óndiriste jaraqat alý deńgeıi 6,3%-ǵa tómendedi. Profılaktıka men buzýshylyqty aldyn alý maqsatynda elimizdiń 3262 kásipornyna qaýipsizdik pen eńbekti qorǵaý standarttary engizildi. 2019 jyldan bastap mınıstrlik «Nóldik jaraqat – Vision Zero» tujyrymdamasyn jetildirýge aıryqsha nazar aýdaryp otyr. Bul tujyrym 605 kásiporynda iske qosylǵan.
Qurylys nysandarynda bas merdigerdiń eńbek qaýipsizdigi máseleleri jóninde barlyq qosalqy merdigerlerge jaýapkershilik pen baqylaýdy kúsheıtetin úlgi engizý qolǵa alynyp, 318 kásiporynda iske qosyldy. Jumys berýshilerge eńbekti qorǵaý talaptarynyń saqtalýyn ózin-ózi tekserýden ótýge múmkindik beretin «Onlaın eńbek konsýltanty» elektrondyq servısi de bar. Servısti búginge deıin 42 985 jumys berýshi paıdalanǵan.