Ishki ister mınıstrligine qarasty Ulttyq ulannyń áskerı qyzmetshileri Soltústik Qazaqstan oblysynyń sý tasqynynan zardap shekken Teplıchnoe jáne Bolshaıa Malyshka aýyldarynda qoǵamdyq tártipti saqtaý jáne urlyq-qarlyqtyń aldyn alý jumystaryn jalǵastyryp jatyr, dep habarlaıdy Egemen.kz.
Kún saıyn patrýldik qyzmet atqaryp júrgen 50 áskerı qyzmetshiniń basty mindeti – sý basqan aýmaqtarǵa ruqsatsyz adamdardyń kirýine jol bermeý, tótenshe oqıǵalar kezinde jedel áreket etý. Ulandyqtar qoǵamdyq tártipti saqtaý barysynda jergilikti bılik ókilderimen jáne TJ qyzmetkerlerimen birlesip jumys júrgizip jatyr.
Eske salaıyq, 24 sáýirden beri Ulttyq ulan Akademııasynyń 800-den astam kýrsanty men 6637 bóliminiń 400-ge jýyq áskerı qyzmetshisi SQO-da 200 myńnan astam qapshyq daıyndady, salynǵan bógettiń jalpy uzyndyǵy 2 shaqyrymnan asyp otyr.
Sondaı-aq, Esil ózeniniń tasýy saldarynan buzylǵan Bolshaıa Malyshka aýyly mańyndaǵy bógetti 6637 áskerı bóliminiń kúshteri, naqty ataǵanda 100-den astam áskerı qyzmetkeri bekitý jumystaryn júrgizdi. Atalǵan jumystar táýlik boıy úzdiksiz atqarylyp, jaǵdaı ózgergen saıyn jedel áreket-qımyldary júrgizilip otyrdy.
Sonymen qatar, tabıǵı apattyń aldyn alý úshin 500-den astam ınertti materıal salynǵan qaptar daıyndaldy. Áskerıler búgin de táýlik boıy qyzmet atqarady. Olar azamattardyń qaýipsizdigin qamtamasyz etip, sý basqan aýmaqtardaǵy múlikti kúzetip júr.