Jeńistiń 80 jyldyǵyna oraı Batys Qazaqstan oblysyna arnaıy kelgen «Generaldar keńesi» respýblıkalyq qoǵamdyq birlestiginiń músheleri birqatar aýdanda bolyp, halyqpen júzdesip, mańyzdy is-sharalarǵa qatysty, dep habarlaıdy Egemen.kz.
Jánibek aýdanyna at basyn burǵan mártebeli meımandardy aýdan ákimi Tımýr Shınııazov, aýdandyq máslıhattyń tóraǵasy Tahır Qadımov pen aýdandyq polısııa bóliminiń basshysy Meıramhan Bapahov aýylǵa kire-beristen qarsy alyp, qonaqjaılyq kórsetip, aq pen baýyrsaq usyndy. Dombyranyń qos isheginde kúı kúmbirletken mádenıet qyzmetkerleri kelgen qonaqtardyń kóńilin kóterdi.
Qonaqtar quramynda «Generaldar keńesiniń» tóraǵasy, general-leıtenant Beksultan Sársekov, tóralqa tóraǵasynyń orynbasary, Astana qalasyndaǵy fılıal basshysy, Ulttyq qaýipsizdik komıtetiniń ókili, general-maıor О́mirtaı Bitimov, tóralqa músheleri, Ulttyq qaýipsizdik komıtetiniń ókilderi, general-maıor Mustafa Mahambet pen Shaımurat Otarbaev, Ulttyq ulan ókili, general-maıor Álibek Seralıev, Ishki ister mınıstrliginiń ókili, general-maıor Tólegen Raqymjanov, keńestiń jaýapty hatshysy Talǵat Qanalıev, «Olja» aksıonerlik qoǵamy dırektorlar keńesiniń tóraǵasy, jerlesimiz Sultan Netalıev pen oblystyń basshy-qosshylary bar.
Olar eń aldymen aýdandyq mádenıet úıinde turǵyndarmen kezdesti. Aýdan ákimi Tımýr Shınııazov soǵys órti sharpyǵan meken týraly qysqasha baıandap, kelgen meımandarǵa kishigirim kádesyı tartý etti. Odan soń sóz kezegin alǵan «Generaldar keńesi» respýblıkalyq qoǵamdyq birlestiginiń tóralqa tóraǵasy, Ishki ister mınıstrliginiń ókili, general-leıtenant Beksultan Sársekov ózderiniń kelgendegi maqsatyn aıtyp, osy kezge deıin atqarǵan jumystaryna toqtaldy. Sonymen qatar ol aýdan basshysy Tımýr Serikulyna Keńes Odaǵynyń Batyry, elimizdiń tuńǵysh qorǵanys mınıstri Saǵadat Nurmaǵambetov atyndaǵy tósbelgini, Amangeldi Myrzaǵalıuly men Tahır Zınurulyna avıasııa general-maıory, Keńes Odaǵynyń eki márte batyry Talǵat Bıgeldınov atyndaǵy tósbelgini keýdelerine taqty.
Sonan soń Amangeldi Myrzaǵalıuly minbege kóterilip, aýdanǵa «Qaharman» mártebesin berýdegi atqaryp kelgen jumystardy atap ótti. Alaıda, jumystar nátıje bermeı, aýdan aýyzsha ǵana qaharman bop atalyp júrgenin jetkizdi. Onyń pikirinshe, jaqyn arada «Qaharman aýdan» mártebesi zań júzinde de berilerine senim mol.
Mádenıet úıinde ótken kezdesýden keıin aýdan ortalyǵyndaǵy «Qaharman aýdan» obelıskine barǵan meımandardy «Jánibek sazy» halyqtyq-folklorlyq ansambli qarsy aldy. Estelik sýretke túsken generaldar alańda jasaqtalǵan kórmemen tanysty. Ol jerge aýdandyq tarıhı-ólketaný mýzeıi soǵys kezin eske salatyn jádigerlerdi qoısa, aýdandyq ortalyqtandyrylǵan kitaphanalar júıesi kitap kórmesin tanystyrdy.
Osy kúni «Generaldar keńesi» birlestiginiń músheleri aýyldyń ońtústik-batys betinde ornalasqan baýyrlastar qorymyna bet aldy. Onda soǵys jyldarynda qaza bolǵan 140 bozdaq máńgige tynys tapqan. Ishinde sardarlar men qatardaǵy sarbazdar, medbıkeler bar. Sonymen qatar burynǵy №804 jyljymaly mehanıkalandyrylǵan kolonna ǵımaraty aýmaǵynda ornalasqan baýyrlastar zıratynda boldy. Munda 1942-1943 jyldary qaza tapqan 70 jaýynger jerlengen. Qos zıratqa generaldar gúl shoǵyn qoıyp, taǵzym etti.
Odan keıin soǵys kezinde bomba túsken sý munarasyna baryp, tarıhyna qanyǵyp batyrlar alleıasyna aıaldady. Munda M.Mámetova, H.Dospanova, E.Nıetqalıev, N.Chýrıkov eskertkishteri men jalpy aýdannan soǵysqa attanǵan 3602 adamnyń esimi jazylǵan taqta bar. Jınalǵandar bir mınýt únsizdikpen eske alyp, máńgilik alaýǵa gúl shoqtaryn qoıdy.
Jánibek aýdanyna kelgen «Generaldar keńesi» músheleri sapardy «Túlekter» saıabaǵynda tal-terek otyrǵyzýmen támamdady. Árbir general bir-bir terekten otyrǵyzyp, Jánibek aýdanynyń tarıhynda qaldy. Endi Jánibek saıabaǵynda «Generaldar alleıasy» da bar.
Sonymen birge generaldar Bókeı Ordasy aýdanyna da bet burdy. Aldymen olar qazaqtyń tuńǵysh kavalerııa generaly Ǵubaıdolla Jáńgirov, tuńǵysh kásibı áskerı general Shákir Jeksenbaev, tuńǵysh ishki ister generaly Talap Qabdenovterdiń kindik qany tamǵan tarıhı qut-mekenge táý etti. Generaldar kóshin Han ordasynyń kireberis qaqpasynan aýdan basshysy Nurlybek Damýov, aýyl ákimi Álibek Aıtqalıev, mýzeı-qoryqtyń basshysy Ǵaısa Mahımov bastaǵan aýyl azamattary men aqjaýlyqty analarymyz aq usynyp, aq jarma kóńilmen qarsy aldy. Qonaqtar mýzeı-qoryqty aralap, aýdan tarıhyna qanyqty.
Aýdan ortalyǵyndaǵy «Qarý amanaty» saıabaǵynda jergilikti turǵyndarmen júzdesip, soǵys qurbandaryn bir mınýttyq únsizdikpen eske alyp, qaharmandar eskertkishine gúlshoqtaryn qoıdy. Sonymen qatar, generaldar aýdan aktıvimen kezdesti.
Aýdan ákimi Nurlybek Daýmovtyń tóraǵalyǵymen ótken is-sharada keleli máseleler qozǵalyp, usynystar aıtyldy. «Bókeı ordasy – Stalıngrad shaıqasynyń eń jaqyn tyly bolǵan, soǵysty bastan ótkergen aýdan. Resmı derekter boıynsha Orda aýdanynan Orda áskerı komıssarıaty arqyly maıdanǵa 4613 adam attansa, olardyń ishinen soǵystan oralmaǵandary – 3028 adam. Onyń ishinde, urys dalasynda qaza bolǵandary – 1408, habar-osharsyz ketkenderi – 1410, jaraqattan qaıtys bolǵandary – 206, al tutqynda kóz jumǵany – 4 adam. Bókeı ordasy aýdanynan úsh birdeı Keńes Odaǵynyń batyry, bir Halyq qaharmany shyqty», dep aýdan ákimi soǵys jyldaryndaǵy aýdan tarıhynan málimet berip ótti.
Sóz alǵan «Generaldar keńesi» respýblıkalyq qoǵamdyq birlestigi tóralqasynyń tóraǵasy, general-leıtenant Beksultan Sársekov Batys Qazaqstannyń shalǵaıda jatqan qos birdeı aýdanyna arnaıy kelýleriniń maqsatyn aıtyp, búginginiń bas aýyrtar máselelerin de tilge tıek etti.
«9 mamyr – toılaıtyn mereke emes, ótkennen sabaq alatyn, búginginiń parqyna boılap, taǵylym alatyn kún. Bul kún – Otan úshin sheıit bolǵan atalarymyzdyń, jesir qap, qasiret keship, jastaı solǵan analarymyzdyń, balalyqpen erte qoshtasyp, belderi qatpaı, eńbekke aralasqan soǵys balalarynyń rýhyna taǵzym etetin kún. El aralap, jergilikti turǵyndarmen kezdesýdegi maqsatymyzdyń biri – jastar arasynda otansúıgishtik, patrıottyq tárbıeni nasıhattaý. Bizdiń jastyq shaǵymyzda «Men de eshkimnen kem emespin. Qatarymnan qalmaımyn» dep áskerge barýǵa qulshynyp tursa, qazirgi jastar dárigerlerdiń esigin tozdyryp, qalaıda bir aqaýlyqty izdep taýyp, «kemistigim bar» dep áskerge barmaýdyń túrli sebebin taýyp, buǵyp qalady.
Saparymyzdyń ekinshi bir maqsaty – soǵys oty sharpyǵan qos aýdanǵa óz aıaǵymyzben baryp, óz kózimizben kórip, qaharman aýdan ataǵynyń berilýine septesý. Burynǵy Stalıngrad, qazirgi Volgograd – batyr qala degen mártebege ıe. Al, osy batyr qalanyń eń jaqyn tyly bolǵan, jaý ushaqtary kózdegen negizgi nysany – Jánibek, Orda aýdandaryna eshqandaı mártebe berilmegeni tarıhı ádiletsizdik», deıdi Beksultan Sársekov.