Makınsk qalasynyń turǵyndary ekinshi jyl qatarynan saıabaqtarynyń jaıyn aıtyp dabyl qaǵyp keledi. Sportıvnyı kóshesiniń boıyndaǵy shaǵyn parktiń bir búıiri adam kórgisiz. Aǵashtary shirip, batpaqqa aınalǵan.
Turǵyndardyń aıtýyna qaraǵanda, shaqpaq tas tóselip, tabıǵı sýaǵarlardy jaýyp tastaǵan.
– Osydan eki jyl buryn qurylysshylar iske kiriskende tóbemiz kókke eki-aq eli jetpeı qaldy, – deıdi qala turǵyny Jasulan Káribaev. – Áýelgi jospar boıynsha orman shoqtarynyń etegin kádimgi saıabaqqa aınaldyrmaq edi. Jaıaý júrginshiler joly tóselip, jaıly oryndyqtar qoıylmaq. Sam jamyraǵanda aspaly shamdar tóńirekti kúndizgideı jap-jaryq etpek. Halyq sengen. Sengen soń qýanǵan. Ertegideı ádemi jospar oryndala qoımapty. Oryndyq ta, sham da joq. Saıabaq degen ataýy ǵana, saıa bolatyn eshteńe kórinbeıdi. Shaqpaq tastar tóselgen jol kóktemgi qyzyl sýdyń jolyn bógep, qorysqa aınaldy. О́tken jylǵy kóktemde erigen qar sýy lyqyldap aǵyp kelip, jolǵa tirelgen. Ylǵalǵa meltektegen qyrýar aǵash shirı bastady.
Jergilikti turǵyndar saǵy synǵan saıabaqtyń jaıyn aıtyp jergilikti ákimdikke hat joldaǵan. Tipti oblystyq orman sharýashylyǵy jáne janýarlar álemi aýmaqtyq ınspeksııasyna da ujymdyq shaǵym joldasa kerek. Aryz-shaǵymnan keıin Bulandy aýdandyq turǵyn úı-kommýnaldyq sharýashylyǵy bólimi, qalalyq máslıhat ókilderi, qala ákimi kelip, saıabaqty kózderimen kórip, az ýaqyttyń ishinde bárin tártipke keltiremiz dep sendirgen. Áıtse de eshqaısysy jaz boıy at izin salmapty. О́tken jylǵy ujymdyq shaǵymǵa aýdan basshylary arnaýly tehnıkanyń kómegimen sý ótkizetin qubyrlar ornatyldy, jınalyp qalǵan sý tógildi. Barlyq kemshilik joıylyp, ornyna keltirildi degen jaýap kelgen.
Shyn máninde bul jerge eshkim de kelgen joq deıdi qala turǵyndary. Park mańyndaǵy turǵyndardyń aıtýlaryna qaraǵanda, buryn sýaǵarlar septigin tıgizip tursa kerek. Kóktemgi qar sýy jyralar arqyly tómenge aǵyp ketetin bolǵan. Qazir bul jyralar jabylyp qalǵan. Kesiri qyrýar aǵashqa tıdi. Jaz boıy baqa basyp ketedi. Batpaqqa aınalǵan jerdiń masasy men shybyn-shirkeıi býyp turady. Sasyq ıisi qolqany qabady. Saıabaq ishindegi jaıaý júrginshiler júretin joldyń ózi sapasyz salynǵan. Bireýi jańa paıda bolǵan kólshikke kelip tirelse, ekinshisi kúrt úziledi.
Saıabaqty saqtap qalamyz degen ynta bolǵanymen, naqtyly jumys joqtyń qasy. Bulandy aýdandyq turǵyn úı kommýnaldyq sharýashylyǵy bóliminiń basshysy Asylbek Esimovtiń pikirinshe, saıabaqty jóndeýden ótkizýdi kózdegen joba qarjynyń jetimsizdiginen toqtap qalǵan. Konkýrs erte ótkizilgen, merdiger anyqtalǵan. Áıtse de qarjy joq.
– Qazir saıabaqtaǵy sýdy aǵyzyp jiberdik, endi sý ótkizetin qubyrdy qaı jerge ornatý týraly aqyldasýdamyz, jerdiń kebýin tosyp otyrmyz, – deıdi bólim basshysy. – Bálkim mamyr aıynyń ekinshi jartysynda bastalyp qalýy múmkin. Jobany jumysty bastaǵan kompanııa aıaqtamaq. Olar sý shaıyp ketken alańqaılardy da tártipke keltiredi.
Qyrýar jumys kútip tur. Qala turǵyndary saıabaqtyń sánin keletindiginen úmitti.
Aqmola oblysy,
Bulandy aýdany