Buǵan deıin metall synyqtaryn jınaýmen aınalysatyn jeke tulǵalardyń kirisine 85% salyq jeńildigi berilgen bolsa, endi atalǵan norma kúshin joıǵan. Taıaýda «Tústi metall jáne metall qaldyqtaryn jınaýshylar qaýymdastyǵy» Ulttyq ekonomıka mınıstrligi men Májiliske hat joldap, máseleniń jaı-japsaryn túsindirýdi surady.
«Bul qadam memlekettik saıasat aıasynda salyqtyq jeńildikti 20%-ǵa qysqartý maqsatynda qabyldanǵan. Dese de munyń saldaryna úńile bilýimiz kerek. El ekonomıkasy munaıdan ǵana turmaıdy. Metallýrgııa salasy ekonomıkada strategııalyq mańyzǵa ıe, al metall synyqtaryn jınaý men qaıta óńdeý – onyń ajyramas bóligi. Metallýrgııalyq kásiporyndar shıkizat retinde qaıtalama metaldardy paıdalanady, bul óndiristik shyǵyndy azaıtyp, tabıǵı resýrsqa túsetin júktemeni jeńildetedi. Álemdik tájirıbege súıensek, 1 tonna bolatty qaıta óńdeý 1,5 tonna temir kenin jáne 0,5 tonna kómirdi únemdeýge múmkindik beredi. Sondaı-aq metaldardy qaıta óńdeý ekologııalyq júktemeni azaıtady, óıtkeni ol bastapqy kendi óndirý jáne óńdeýge ketetin shyǵyndy qysqartady», dedi qaýymdastyq óz málimdemesinde.
Olardyń aıtýynsha, qazir qara jáne tústi metaldardyń qaldyǵy men synyǵyn qarapaıym azamattar jınaıdy. Olardyń úlesi metall synyqtaryn jınaýdyń jalpy kóleminiń 80%-yn quraıdy. Biraq jańa salyqtyq talaptar bul azamattardyń tabysynan aıyrylyp, metall synyqtaryn tapsyrýǵa degen yntasyn kemitpek.
Bul rette qaýymdastyq metall synyqtaryn jınaýmen aınalysatyn jeke tulǵalar úshin salyq jeńildikterin qaıtarý; metall synyqtardy qaıta óńdeıtin kásiporyndarǵa salyqtyq demalystar nemese sýbsıdııa berý; lısenzııalaý jáne baqylaý júıesin jetildirý; metall synyqtaryn jınaýshylarǵa arnalǵan tirkeý rásimderin jeńildetý; jańa salyqtyq talaptardyń ekonomıka men metall naryǵyna áserin jan-jaqty zertteý sııaqty usynystar joldaıdy.
«Úkimettiń bıýdjet tapshylyǵyn qysqartýǵa tyrysyp jatqany quptarlyq shara, degenmen qara jáne tústi metaldardyń qaldyǵyn jınaıtyn azamattar úshin jeńildiktiń joıylýy qıyndyq týǵyzaıyn dep tur. Sondyqtan salyqtyq ózgeristerdi qaıta qarap, balama sharalardy qarastyrý mańyzdy», deıdi qaýymdastyq ókilderi.
Ekonomıst Alpamys Segizbaıulynyń sózinshe, qaýymdastyqtyń kóterip otyrǵan máselesi óte ózekti. Sarapshy máseleni «Atameken» UKP-men birlesip sheshýdi usynady.
«Tıisti mekemeler men Májiliske hat joldamas buryn memlekettik ınstıtýttarǵa problemany sheshý joldaryn usynyp, talqylatyp alǵany durys bolar edi. Instıtýttar máseleni tereńirek zerdelep, ýájdiń oryndy ekenin kórsetip beredi. Menińshe, jalǵyz qaýymdastyq emes, birneshe qaýymdastyq birlese otyryp hat joldasa, mınıstrlik pen Májilis qulaq asar edi», degen oıyn jetkizdi sarapshy.