Soltústik Qazaqstan oblysy ekonomıkasynyń bıyldyń alǵashqy toqsanyndaǵy jalpy ósiminde aýyl sharýashylyǵy alda bolyp, 36,4 mlrd teńge kólemmen byltyrǵy jyldan 7,5% artyq ónimge qol jetkizdi. Sonyń ishinde mal sharýashylyǵy ónimderi 7,7%-ǵa artty. Et óndirý 9,7%, sút 5,9%-ǵa ósti. Jylda ósimi mardymsyz bolyp júretin jumyrtqa óndirý de 3,6%-ǵa artyp otyr.
Oblys ákimi Ǵaýez Nurmuhambetovtiń aıtýynsha, qazir óńir aýyl sharýashylyǵynyń negizgi kapıtalyna ınvestısııa tartý josparyn oryndaý jóninen elimizde eń aldyńǵy orynǵa shyǵyp otyr. Búginniń ózinde oblys Aýyl sharýashylyǵy mınıstrliginiń aımaqqa belgilegen josparynyń tórtten birin oryndaǵan. Aýyl sharýashylyǵy basqarmasynyń bastyǵy Dáýren Toqýshynov aldaǵy ýaqytta da osy qarqynnan túspeıtindikterin aıtty.
О́nerkásip salasynda alynǵan jalpy ónim kólemi 162,3 mlrd teńge bolyp, byltyrǵy jyldyń sáıkes merzimimen salystyrǵanda 0,2% tómendedi. Alaıda taý-ken óndirý ónerkásibinde óndiris kólemi 27,5%-ǵa artty. О́nerkásiptiń shamamen 80%-y óńdeý ónerkásibine tıesili. Bul saladaǵy ónim 129,6 mlrd teńge bolyp, byltyrǵy jyldyń sáıkes merzimimen salystyrǵanda 0,1 paıyz ǵana ósim baıqaldy. Sondaı-aq elektr energııasymen, gazben, býmen, ystyq sýmen, kondısıonerlengen aýamen jabdyqtaý 9%-ǵa tómendedi.
Qurylys jumystary jyldyń alǵashqy toqsanynda ósim qarqynynan aırylǵan joq. Úsh aıda sala belgilengen mejeni 28,8% artyq oryndady. Kúrdeli jóndeýler kólemi byltyrǵydan 1,6 ese artyq bolyp, 2,2 mlrd teńge boldy. Aǵymdaǵy jóndeýler de byltyrǵy jyldyń sáıkes merziminen 18,0%-ǵa asyp tústi.
Úsh aıda oblys boıynsha 30,6 myń sharshy metrdiń turǵyn úıi paıdalanýǵa berildi. Bul byltyrmen salystyrǵanda 7,3%-ǵa artyq. Jetistiktiń negizgi bóligi jekemenshik turǵyn úı qurylysynyń esebinen bolyp otyr. Paıdalanýǵa berilgen barlyq turǵyn úıdiń 97%-y solardyń úlesi. Bul kórsetkish boıynsha aýdandar arasynda Esil, Mamlıýt, Aıyrtaý aýdandary kósh bastap tur. Tek Tımırıazev aýdany ǵana artqa tartyp, byltyrǵydan 4,5% tómen boldy.
Toǵyz joldyń torabynda ornalasqan oblystyń ishki, syrtqy saýdasy jyldyń alǵashqy toqsanynda 206,7 mlrd teńgeni qurap, byltyrǵymen salystyrǵanda 10,8% artyq boldy. Bólshek saýdada úsh aıda 89,3 mlrd teńgeniń taýary satylǵan.
Kólik salasyndaǵy tabys mardymdy emes. Jyl basynan beri salanyń kórsetkishi 63,4 mlrd teńge bolyp, byltyrǵydan sál tómendep ketti. Oblystyń ekonomıka basqarmasynyń basshysy Qýanyshbek Qalıjanov «munyń basty sebebi statıstıka organdarynyń esepteýdiń durys tásilin qoldanbaýynda» deıdi. Ne de bolsa bul sala oblystyń kórsetkishterin artqa tartyp tur.
Baılanys salasy úsh aıda 3,0 mlrd teńgeniń jumysyn atqaryp, 3,4% ósim kórsetken. Bul – oblystyń 138 mektebine «Starlink» jaraqtaryn qoıdyryp, «Transtelekom» AQ-men aradaǵy máselelerdi sheshýdiń arqasynda qol jetkizilgen tabys.
«Oblys Úkimettiń ekonomıkalyq ósimge baılanysty tapsyrmalaryn buljytpaı oryndaý jolynda qala, aýdan ákimderi aı saıyn 7 paıyzdyq ósimge qol jetkizýdi, barlyq ınfraqurylymdyq jobalardyń tolyq, ýaqtyly oryndalýyn qamtamasyz etýleri kerek, ekonomıkanyń ósýine septesetin qosymsha rezervter tabýy qajet», deıdi Ekonomıka basqarmasynyń basshysy Qýanyshbek Qalıjanov.
Soltústik Qazaqstan oblysy