Qazaqstan BUU-nyń kúsh-jigerin qoldaıdy

Jıdda qalasynda (Saýd Arabııasy Koroldigi) Islam Yntymaqtastyǵy Uıymynyń Syrtqy ister mınıstrleri keńesiniń Iemen boıynsha tótenshe otyrysy ótti. Otyrys jumysyna Qazaqstan Respýblıkasy Syrtqy ister mınıstriniń orynbasary Asqar Mýsınovtiń basshylyǵymen Qazaqstan delegasııasy qatysty. Qatysýshylardyń aldynda Iemen Prezıdenti Ábd-Rabbý Mansur Hadı sóz sóılep, eldegi qalyptasqan ahýal men Iemendegi jan­jaldy retteý boıynsha jasal­ǵan is-qımyldarmen tanystyrdy. IYU-ǵa múshe elder syrtqy saıasat vedomstvolarynyń basshylary Iemendegi aǵymdaǵy áskerı-saıası daǵdarysty, sondaı-aq, osy elde beıbitshilik pen turaqtylyqty qamtamasyz etý joldaryn talqylady. Delegasııalar basshylary biraýyzdan beıbitshilik pen turaqtylyqty tez arada qalpyna keltirýge, sondaı-aq, BUU Qaýipsizdik Keńesiniń 2216-shy qararynyń negizinde Iemendegi ártúrli saıası kúshterdiń arasynda kelissózder úderisin júrgizý men basqa da halyqaralyq bastamalardy qoldaýǵa shaqyrdy. О́z sózinde A.Mýsınov Iemen janjalyn retteýge qatysty beıbit sheshim men aýmaqtyq tutastyqty qamtamasyz etý, zań ústemdigi men barlyq múddeli taraptardyń qatysýymen ulttyq únqatysý qaǵıdattaryna negizdelgen Qazaqstan ustanymyn jetkizdi. Qazaqstannyń BUU-nyń Jenevada ıemenaralyq konsýltasııalardy ótkizý, sondaı-aq, IYU jáne basqa da halyqaralyq uıymdardyń Iemenge tez arada gýmanıtarlyq kómek kórsetý boıynsha bastamalaryn uıymdastyrý jónindegi kúsh-jigerlerin qoldaıtynyn atap kórsetti. Sessııa sheńberinde Qazaqstan delegasııasynyń basshysy Lıvııa Syrtqy ister mınıstri Muhammed ál-Daırımen ekijaqty kezdesý ótkizip, onyń barysynda taraptar ekijaqty yntymaqtastyq jaıyn, sonyń ishinde BUU Qaýipsizdik Keńesiniń 2017-2018 jyldarǵa turaqty emes músheligine Qazaqstan kandıdatýrasyna qoldaý kórsetý máselelerin talqylady. 1969 jyly qurylǵan Islam Yn­ty­maqtastyǵy Uıymy BUU-dan keıingi ekinshi iri halyq­aralyq uıym bolyp tabylady jáne 56 memleketti (Uıymdaǵy múshe­ligi toqtatylǵan Sırııany qospa­ǵanda) biriktiredi. IYU-nyń qyzmeti musylman memle­ket­teri arasyndaǵy saıası, ekono­mı­kalyq jáne gýmanıtarlyq ynty­maqtastyq máseleleriniń keń aýqymyn qamtıdy. «Egemen-aqparat».