Atyraý oblysyndaǵy «Muqyr – Qulsary» avtojolynyń bir bóliginde topyraqty turaqtandyratyn «QSmart-S» qospasyn qoldaný bastaldy. Qum bólshekterin turaqty ári tyǵyz shógindi qurylymǵa aınaldyratyn jańa «QSmart-K» katalızatory jerasty sýlarymen qumnyń shaıylyp ketýine jol bermeıdi, dep habarlaıdy Egemen.kz.
«QazjolǴZI» (Qazaqstan jol ǵylymı-zertteý ınstıtýty) ǵalymdarynyń ınnovasııalyq ázirlemesi álsiz ári turaqsyz topyraqty nyǵaıtýǵa arnalǵan. Sondaı-aq, jol jamylǵysynyń deformasııasy men shógýiniń aldyn alýǵa múmkindik beredi. Synaq barysynda Instıtýt ǵalymdary úsh aı boıy telim topyraǵyn zerttep, barlyq qajetti hımııalyq taldaýlar men zerthanalyq is júrgizgen.
Buǵan deıin bul qospa elimizdiń ártúrli klımattyq aımaqtarynda ornalasqan eki pılottyq nysanda synaqtan sátti ótip, óz tıimdiligin dáleldegen. Instıtýt mamandarynyń aıtýynsha, qazirgi ýaqytta qospalardy ýnıfıkasııalaý saıasaty júzege asyrylyp jatyr. Árbir quram naqty bir topyraq túri men aımaqtyń erekshelikterine beıimdelip, jetildendirilýi qajet.
«Jumys jańa materıaldardy qoldanýǵa arnalǵan pılottyq joba aıasynda júrgizilip jatyr. Atyraý oblysyndaǵy topyraqtyń túrleri aralas bolyp keledi. Olardyń qatarynda sortań, sazdaq jáne qumdaq kezdesetinin eskere otyryp, qospany qoldanbas buryn Instıtýt ǵalymdary úsh aı boıy telim topyraǵyn zerttep, barlyq qajetti hımııalyq taldaýlar men zerthanalyq synaqtardy júrgizdi. «QSmart-S» qospasyn qoldaný barysynda normatıvterdiń, tehnologııanyń jáne sapanyń saqtalýyn qamtamasyz etý úshin ýchaskede bizdiń ókilimiz turaqty túrde baqylaý júrgizip otyr», dedi «QazjolǴZI»-dyń jol-qurylys materıaldary jáne jańa tehnologııalar departamentiniń dırektory Meıramgúl Qabdyǵalıeva.
Qospa onnan astam ónimdi qamtıtyn «QSmart» jelisindegi otandyq ǵylymı ázirlemeler serııasyna kiredi. Olardyń qatarynda qum bólshekterin turaqty ári tyǵyz shógindi qurylymǵa aınaldyratyn jańa «QSmart-K» katalızatory da bar. Zertteýshilerdiń aıtýynsha, bul tehnologııa elimizde balamasy joq jáne topyraqty paıdalaný kezinde jerasty sýlarymen qumnyń shaıylyp ketýin boldyrmaı, negizgi tósem shógýiniń aldyn alady.