Astanada Uly Jeńistiń 80 jyldyǵyna arnalǵan saltanatty áskerı sherýge qyzý daıyndyq júrip jatyr. El astanasynyń ortalyq kóshelerinde kún saıyn áskerıler sap túzep, arnaıy tehnıkalar sherý tártibimen júrip ótýdi pysyqtaýda, dep habarlaıdy Egemen.kz.
Otan qorǵaýshylar kúnine arnalǵan saltanatty áskerı sherýge sanaýly kúnder ǵana qaldy. Bıyl elimiz Uly Jeńistiń 80 jyldyǵyn atap ótedi.
7 mamyr kúni ótetin sherý Táýelsizdik alańynda, «Qazaq eli» monýmentiniń janynda uıymdastyrylady. El júreginde ótetin bul kóriniske 4000-nan astam áskerı qyzmetshi, 24 paradtyq eseptop, 200-den asa áskerı tehnıka men qarý-jaraq túrleri qatysady. Sonymen qatar, bıylǵy sherýdiń ereksheligi – áýe shoýynyń aýqymdylyǵy. Qazaqstannyń maıdandyq, armııalyq jáne áskerı-kóliktik avıasııasy qatarynan 66 ushý apparaty elorda aspanynda qalyqtaıtyn bolady.
Sherý úsh negizgi bólimnen turady. Alǵashqy kezeń – jaıaý áskerdiń saptyq sherýi. Elimizdiń ár túkpirinen jınalǵan áskerı bólimsheler boı túzeı ótip, el qorǵanys qýatynyń aıqyn beınesin kórsetpek.
Ekinshi bólimde kórermender nazaryna mehanıkalandyrylǵan kolonnalar usynylady. Bul qatarda tarıhı jaýyngerlik tehnıkalar men qazirgi zamanǵy zamanaýı qarý-jaraqtar óz sherýin ótkizedi.
Sherýdiń sharyqtaý shegi – áýe parady. Qýatty qozǵaltqyshtar gúrili men aspandy tilip ótetin avıasııa – eldiń áýe qorǵanysynyń temir qanaty men aıbyndy rýhynyń belgisi.
Áýe kúshteri 7 mamyrda tolyq quramda Astana aspanynda qalyqtaıdy.