Elordada Jeńistiń 80 jyldyǵyna arnalǵan fotokórme ashyldy. Is-sharany «Kazinform» halyqaralyq aqparattyq agenttigi «Qazaqstan temir joly» ulttyq kompanııasymen birlesip uıymdastyryp otyr.
Bir ǵasyrdan asa ýaqyt boıy aqparat aıdynynda qyzmet etip kele jatqan agenttik kórmede Ekinshi dúnıejúzilik soǵys kezindegi Qazaqstan kórinisin, jan aıamaı jumys istegen tyldaǵy otandastarymyzdyń eńbegin, beınetin beıneleıtin biregeı muraǵat fotosýretterin kórermen nazaryna usyndy. Kórmege qoıylǵan fotosýretterdiń keıipkerleri – sarbazdar, jumysshylar, dárigerler, ǵalymdar. Olardyń qatarynda aty ańyzǵa aınalǵan ushqysh, eki márte Keńes Odaǵynyń batyry Talǵat Bıgeldınov, Keńes Odaǵynyń batyry, ataqty mergen Álııa Moldaǵulova, batyl pýlemetshi Mánshúk Mámetova, general-maıor Ivan Panfılov, Keńes Odaǵynyń batyry Baýyrjan Momyshuly jáne taǵy basqalar bar.
Uıymdastyrýshylardyń deregine súıensek, osy sátterden túsirilgen kóptegen sýret avtorlarynyń esimderi, ókinishke qaraı, belgisiz. Saqtalǵan esimderdiń arasynda V.Grebnev, Iý.Redkın, Galkın bar. Avtoryn anyqtaý jumysy jalǵasyp jatyr. «Barlyǵy maıdan úshin, bári jeńis úshin!» urany sol syndarly ýaqyttaǵy qazaq jurtynyń ómir saltyna enip, birlik pen batyldyq kezeńine aınaldy. Sonyń nátıjesi bolar, jaýǵa qarsy atylǵan on oqtyń toǵyzy Qazaqstan zaýyttarynda quıylǵan. Maıdanǵa 1500 vagon azyq-túlik, kıim-keshek jiberildi. Jeńil ónerkásip kásiporyndary 2 mıllıon jaýynger men ofıserdi kıim-keshekpen qamtamasyz etti. 78 aýrýhanada jaralylar emdelgen. Tek qorǵanys qoryna elimiz 4 mıllıon rýblden asa úles qosypty. Al 1945 jyly stýdentterdiń qarajatyna salynǵan tank kolonnasy Berlınge shabýyl jasaýǵa qatysty.
Fotokórme «Nurly jol» vokzalynyń Ortalyq kútý zalynda ótip jatyr.