Úleskerlik qurylys naryǵynda barlyq tarapqa túsinikti, adal erejeler ornatý, ınvestısııalanǵan aqshany qorǵaý, páterdiń ýaqytynda jáne ýáde etilgendeı salynýyn qadaǵalaý maqsatynda mańyzdy ózgerister engizilip jatyr, dep habarlaıdy Egemen.kz.
Elimizde Turǵyn úı qatynastary týraly zańnamany jetildirý sheńberinde ázirlengen jańa zań jobasy úleskerlerdiń quqyqtaryn qorǵaýdy kúsheıtýge, qurylystyń barlyq kezeńinde jobalardyń ashyqtyǵyn qamtamasyz etýge jáne qurylys salýshylarǵa qoıylatyn talaptardy qatańdatýǵa baǵyttalǵan. Zań jobasynda turǵyn úı qurylysyna úlestik qatysýdyń negizgi aspektilerin qamtıtyn birqatar jańashyldyq qarastyryldy. Atap aıtqanda, budan bylaı qurylys salýshylar úleskerlerdiń qarajatyn ruqsat qujattarynyń tolyq paketi jáne qarjylyq turaqtylyǵy rastalǵan jaǵdaıda ǵana tarta alady. Bul qurylystyń jetkilikti negizsiz, kepildiktersiz salynýyn boldyrmaıdy. Úlestik qurylystyń barlyq jobalary: iske asyrý kezeńderi, jasalǵan sharttar sany, ruqsattardyń bolýy týraly málimet jınalyp, kórsetiletin aqparattyq júıeni engizý josparlanyp otyr. Bul azamattar úshin derekterdiń qoljetimdiligin qamtamasyz etip, memleket pen jurtshylyqtyń baqylaýyna tıisti jaǵdaı jasaıdy.
Sondaı-aq úleskerdi qorǵaýǵa baǵyttalǵan erejelerdiń mindetti jıyntyǵy bar úlestik qatysý sharttarynyń úlgilik nysandary bekitiledi. Shartty birjaqty tártippen qoldan jasaýǵa nemese májbúrleý táýekelderine jol bermeý úshin ony notarıaldy kýálandyrý múmkindigi qarastyrylady. Qurylys merzimderin buzǵany, burys aqparat bergeni nemese jobalyq sheshimderdi saqtamaǵany úshin jaýapkershiliktiń neǵurlym qatań sharalary kózdelgen. Budan basqa, buzýshylyq anyqtalǵan jaǵdaıda úleskerlerdiń jańa qarajatyn tartýǵa tyıym salýdy qosa alǵanda, qurylys salýshynyń qyzmetin toqtata turý úshin negizder naqtylandy. Jobalyq qujattamaǵa jáne tehnıkalyq tapsyrys berýshige qoıylatyn talap ta qatań. Zań jobasynda osyndaı mamandardy attestattaý júıesin engizýge jáne qurylys sapasyn baqylaýdy kúsheıtýge nazar aýdarylǵan.
Jańa tásil naryqtyń basty máseleleriniń biri – qurylys salýshylarǵa degen senimniń tómendigin jáne páterge qarajat salatyn azamattardyń táýekelderin sheshý úshin mańyzdy.