Almatynyń jas jazýshysy anyqtaldy

Bul baıqaý – S.Begalınniń baı shyǵarmashylyq murasyn jastar arasynda keńinen nasıhattap, balalar ádebıetiniń bolashaǵyna erekshe mán berýdiń jarqyn kórinisi. Qazaqstan Jazýshylar odaǵy, «О́r­ken» balalar ádebıetin damytýǵa jár­dem­desý qoǵamdyq qory jáne Almaty qalasy kitaphanalar jeli­si­niń uıymdastyrýymen júzege asyp otyrǵan bastama – elimizdegi jas qalam­gerlerdiń shyǵarmashylyq áleýetin kóterýge baǵyttalǵan eleýli qadam.

Baıqaý eki tilde – qazaq jáne orys tilderinde qatar jarııalanǵan bolatyn. 9-11 synyp oqýshylary S.Begalınniń «Aldanǵan jolbarys» jáne «Jas butaq» degen eki áńgimesi boıynsha esse jazdy. Barlyq qatysý­shylar úshin baıqaý talaby bylaı bastalady: kitaphanaǵa kelgen oqyrmannyń qolyna Begalınniń áńgimeleri jınaqtalǵan kitap túsedi, ol kitapty bas kótermeı oqı bastaıdy, dál osy mezgilde aýa raıy kúrt buzylyp, nóser jańbyr quıyp, naızaǵaı jarqyldap, jaryq sónedi. Kenet, mine, ǵajap, qolyna telefon ustap, JI ónimin tutynyp júrgen búgingi jasóspirim bala ótken ǵasyrdyń 20-60 jyldaryna, Saparǵalı Begalınniń áńgimelerinde sýretteletin ómir men oqıǵalarǵa tap bolady. Ýaqyt sheńberinen shy­ǵyp ketken qııal-ǵajaıyp saıahat saparynda jasóspirim oqýshy shyǵarma keıipkerlerimen tanysyp, olarǵa shyqqan tegin, nemen shuǵyldanyp, neni qundylyq sanaıtynyn, bul ortaǵa qalaı tap bolǵany týraly aıtyp, kómekke muqtajdyǵyn bil­di­redi. О́z oqıǵasyn ózinshe órip, órbitýge tıis qatysýshylarǵa ınternet kómegine júginýge tyıym salyndy, kerisinshe, shekteýsiz qııal álemine erkin boılap, ýaqyt jigin attap ótken tarazy paıym shynaıy shıratylǵany quptaldy.

«О́rken» balalar ádebıetin damy­týǵa járdemdesý qoǵamdyq bir­lestigi aldaǵy ýaqytta aımaq sheńberinen shy­ǵyp, «Qazaqstannyń jas jazýshysy» res­pýblıkalyq baıqaýyn uıymdas­tyrýdy josparlap otyr. Al Almaty qalasynyń jas oqyrmandarynyń qataryn tolyqtyra berý úshin «О́rken» men qalalyq ortalyqtandyrylǵan ki­tap­hanalar júıesi túrli tapsyr­malardyń kómegimen balalardyń yntasyn oıata berýge nıetti.

– Mysaly, barlyq otbasy balasyna «PlayStation» oıynyn satyp alyp bere almaıdy, sondyqtan Almaty kitaphanalarynyń birinde biz ony tegin oınaı alatyn múmkindikpen qam­ta­masyz ettik,– deıdi Mádı Núsipbaev. – Biraq onyń da sharty bar: «PlayStation» oınaǵysy keletin bala kitaphanashy usynǵan kitapty oqyp, suraqtaryna jaýap berse, kitaphana abonentin ala alady. Kitaphanalar qashan da túr­li taqyryptar tóńi­re­ginde mazmun­dy kezdesýler ótkizip, qyzyqty bas­ta­ma­lardyń uıyt­qysy bolyp júredi, biraq balalarmen jumysty alǵa jyljytatyn «sıqyrly» kiltin taba almaı, oqýǵa qushtarlyǵyn oıata almaı, dármensizdik tanytatynyn jasyra almaımyz. Sondyqtan balalarǵa baıqatpaı, olar da bizdi baıqamaı, kitaphanaǵa jıirek keletindeı amal-tásilderdi birlesip izdeı berýimiz kerek. Balalardyń bolashaǵyna beıjaı qaraı almaıtyn, olardyń ózin shynymen de oqıtyn elde turatynyn sezinýge múmkindik týdyrǵysy kele­tin barlyq kásipkerler men qoǵam­dyq belsendilerdi bizdiń joba­myzǵa qosylýǵa shaqyramyz, – deıdi «О́rken» balalar ádebıetin damytýǵa járdemdesý qoǵamdyq birlestiginiń quryltaıshysy Mádı Núsipbaev.

Ádebı baıqaý jeńimpazdaryna kitap dúkenderiniń sertıfıkattary, kitaptar, al 1-oryn alǵan eki oqýshyǵa planshetter tabystaldy. Qazaq tilindegi shy­ǵar­­­malardyń arasynda S.Begalınniń «Aldan­ǵan jolbarys» áńgimesi negizinde óz essesin jazǵan Abaı atyndaǵy daryndy balalar mektep-ınternatynyń oqýshysy Shyraılym Aıbekqyzy, al orys tilindegi baıqaýda «Saparǵalı Begalınniń sıqyrly álemine saıahat» degen essesimen №52 orta mekteptiń oqýshysy Renat Bekqulov jeńimpaz bolyp tanyldy. Renattyń shyǵar­masyn Qazaqstan Jazýshylar oda­ǵynyń hatshysy Farhat Tamendarov ózi bas redaktory bolyp otyr­ǵan «Prostor» jýrnalynda jarııa­­laýǵa ýáde etti. Oqýshynyń ózi bul baı­qaýdyń bolashaq mamandyq tań­daýyna áseri bolǵanyn jasyrmady.

Bul baıqaý ádebıet kókjıeginde jańa esimderdiń tanylyp, qazaq sóz óneriniń keleshek keńistigine tyń serpin bereri sózsiz.