Prezıdent arhıvinde Jeńistiń 80 jyldyǵyna arnalǵan «Erlikke taǵzym» kitabynyń tusaýkeser rásimi ótti. Sonymen qatar «Qaıtarylǵan esimder» kitap-albomy men «Álmuqan Sembınov. Taǵdyry tarıhqa aınalǵan» jınaqtary tanystyryldy. Ekinshi dúnıejúzilik soǵystyń qatparly tarıhy áli de tolyq ashylmaǵany belgili. Prezıdent arhıvi buryn-sońdy jaryq kórmegen qujattar men fotosýretterdi jınaqtap «Erlikke taǵzym» kitabyn jaryqqa shyǵaryp otyr.
Is-sharany Prezıdent arhıviniń dırektory Álııa Mustafına ashyp, soǵys jyldaryndaǵy maıdangerlerdiń erligin este saqtaýdyń mańyzyna toqtaldy. Sonymen qatar basylymdy daıyndaǵan arhıvshiler men seriktes uıymdarǵa alǵysyn bildirdi.
– Memleket basshysy Q.Toqaev: «Soǵysta qaza tapqandardy umytpaı, qaharman erlerimizdiń rýhyna taǵzym etý, el ishinde beıbitshilik pen tynyshtyqty saqtaý – barshaǵa ortaq paryzymyz» degen bolatyn. «Erlikke taǵzym» jınaǵy – arhıvtik fotosýretter men materıaldar negizinde ázirlengen ǵylymı-zertteýdiń nátıjesi. Jınaq Prezıdent arhıviniń qorlaryn kópshilikke tanystyrýǵa jáne nasıhattaýǵa múmkindik beredi dep senemin. Eki jınaqqa otandyq jáne sheteldik arhıvter men kitaphanalar qorynan fotosýretter men qujattar da engen, – dedi arhıv dırektory.
«Erlikke taǵzym» jınaǵynda Baýyrjan Momyshuly, Mánshúk Mámetova, Álııa Moldaǵulova, Hıýaz Dospanova jáne basqa da batyrlardyń estelikteri qamtylǵan. Onda shynaıy oqıǵalar men naqty adamdar, olardyń taǵdyry men júrek terbegen sezimderi týraly syr shertiledi. Jınaq sonymen birge Ekinshi dúnıejúzilik soǵys jyldarynda qazaqstandyq sarbazdardyń maıdandaǵy erlik jolyn, el ekonomıkasynyń soǵys jaǵdaıyna beıimdelýin, qorǵanys-ónerkásip kesheniniń qurylýy jáne respýblıkanyń maıdannyń qýatty arsenalyna aınalý tarıhyn baıandaıdy.
Halyq qaharmany Baqytjan Ertaev, memleket jáne qoǵam qaıratkeri Álıhan Báımenov, akademık Dıhan Qamzabekuly, muraǵat mamany Evgenııa Chılıkova atalǵan kitaptardyń tusaýyn kesip, ózekti oılaryn ortaǵa saldy.
– Birinshi bólimde Ekinshi dúnıejúzilik soǵys shaıqastaryna Qazaqstannyń áskerı quramalarynyń qatysýy týraly aıtylady. Jarııalanǵan zertteýlerge qaraǵanda, elimizden soǵysqa keminde 9,5 myń áıel qatysqan. Kitaptyń ekinshi bóliminde elimizge evakýasııalanǵan ónerkásip kásiporyndary, aýyl sharýashylyǵynyń úlesi, eńbekkerlerdiń janqııarlyǵy týraly aıtylady. Úshinshi bólim qarapaıym adamdardyń soǵys kezindegi ómirine arnaldy. Tyl ardagerleriniń jeńiske qosqan úlesin umytpaýymyz kerek», dedi kitap qurastyrýshylarynyń biri Evgenııa Chılıkova.
Aıtýlarynsha, jınaqty daıyndaýǵa eki jylǵa jýyq ýaqyt ketken. Prezıdent arhıviniń mamandary óz qorlaryndaǵy materıaldardy paıdalanýmen qatar, elimizdiń óńirlik arhıvteri men ulttyq kitaphanalarynan, О́zbekstan men Reseı arhıvterinen de aqparat jınaqtaǵan. Jınaqtyń jalpy kólemi 253 betti quraıdy. Jınaqqa soǵys jyldarynda shyqqan 30-dan astam gazet qıyndysy, 170-ten astam fotosýret jáne 130 tarıhı qujat engen.
«Dańq» ordeniniń úsh dárejesiniń tolyq ıegeri Álmuqan Sembınov týraly jınaq (qurastyrǵandar: T.Qyshqashbaı, Ǵ.Isahan, A.Qarshyǵauly) batyrdyń maıdandaǵy jáne beıbit jyldardaǵy eńbegin túrli qujattarmen, derekti jazbalarmen, esteliktermen dáıekteı túsedi. Bul mura elordalyqtardyń Á.O.Sembınov jónindegi (Astanada kóshe aty berilgen) maǵlumatyn tolyqtyrady.