Elimizdiń qarýly kúshteri 2014 jyldan beri Birikken Ulttar Uıymynyń bitimgerlik qyzmetine óz úlesin qosyp keledi. Osy ýaqyt ishinde 80 azamat baıqaýshy jáne shtab ofıseri retinde birneshe mıssııaǵa atsalyssa, 700-ge jýyq áskerı qyzmetshi BUU-nyń arnaıy operasııalaryna qatysqan. Al ótken jyldan bastap elimiz bitimgerlik qyzmetti derbes qurammen óz betinshe oryndaýǵa kiristi.
Jýyrda Sırııa men Izraıl arasyndaǵy Golan jotalarynda bir jyldyq bitimgerlik mıssııasyn oıdaǵydaı aıaqtaǵan bir top áskerı qyzmetshimiz elge oralǵan soń, olardy Joǵarǵy Bas qolbasshy Qasym-Jomart Toqaev qabyldaǵany belgili. Sol kezdesýde Memleket basshysy: «Bul áskerimizdiń asa kúrdeli mindetterdi oryndaýǵa qabiletti ekenin kórsetedi. Sizder Sırııa daǵdarysynyń sheshýshi sátinde utymdy ári batyl áreket jasadyńyzdar. Qazaqstan armııasynyń kásibı deńgeıi joǵary ekenin dáleldep berdińizder. Sol kúnderi qazaq jaýyngeriniń asqaq rýhy men qaısarlyǵyna búkil álem kýá boldy», dep baǵa berip, birqatar ofıser men sarbazdy Golan jotalarynda kórsetken erligi men janqııarlyǵy úshin memlekettik nagradalarmen marapattady.
Solardyń biri – Qorǵanys mınıstrligi Bitimgerlik operasııalar ortalyǵynyń basqarma bastyǵy, Sırııaǵa attanǵan alǵashqy ulttyq bitimgerlik kontıngenttiń komandıri, podpolkovnık Jiger Aıypov. Prezıdenttiń qolynan Saǵadat Nurmaǵambetov atyndaǵy I dárejeli «Aıbyn» ordenin keýdesinen taqqa keıipkerimizdiń aıtýynsha, áý basta onyń áskerı salany tańdaýyna Shyǵys Qazaqstan oblysynyń Qatonqaraǵaı aýdanyndaǵy balalyq shaǵy ótken О́reli aýylynyń shekara zastavasyna jaqyn ornalasýy sebep bolypty.
«Bala kúnimnen áskerı kıimdegi shekarashylardy kórip, solar sııaqty bolýdy armandaıtyn edim. Osy armanym alǵa jetelep, Astanadaǵy Saǵadat Nurmaǵambetov atyndaǵy «Jas ulan» respýblıkalyq mektebine oqýǵa tústim. 2004 jyly ony bitirgen soń, Reseıdegi áýe-desanttyq ýchılıshesinde bilim aldym», deıdi ol.
2009 jyly elge oralǵan Jiger Muratuly Aeroutqyr áskerleri qataryn tolyqtyrady. Keıin desanttyq-shabýyldaýshy áskerler bolyp qaıta qurylǵan osy áskerı qurylym qatarynda Taldyqorǵan, Qonaev, Almaty qalalarynda vzvod komandırinen bastap Bitimgerlik polktiń shtab bastyǵyna deıingi túrli qyzmet tizginin ustaǵan soń, 2022 jyly Qorǵanys mınıstrligi Bitimgerlik operasııalar ortalyǵynyń Oqý úderisin qamtamasyz etý basqarmasynyń bastyǵy laýazymyna taǵaıyndalady. Sodan byltyr elimizdiń tuńǵysh ulttyq bitimgerler kontıngentin bastap Golan jotalaryna attandy.
«Shetelge bitimger retinde barýǵa, árıne, áskerı qyzmetshiniń óz qalaýy bolýy kerek. Eger adam ózi barǵysy kelse, ol aldymen qatań irikteýden ótedi. Birinshiden – medısınalyq, ekinshiden – psıhologııalyq, úshinshiden – dene daıyndyǵy tekserisinen súrinbeýi qajet. Sondaı-aq mamandyǵy boıynsha synaq tapsyrady. Buǵan qosa ofıserler men serjanttar mindetti túrde aǵylshyn tilin bilýi kerek», deıdi keıipkerimiz.
Byltyr 14 naýryzda 139 adamnan turatyn bitimgerlik kontıngenti Almaty qalasynan Golan jotalaryna jetken soń, sol jaqta bir jyl bitimgerlik mıssııasyn aıaqtaǵan Irlandııanyń kontıngentin almastyrǵan. Jalpy, Sırııa men Izraıl arasyndaǵy daýly aımaq sanalatyn bul ólkede Qazaqstannan bólek, Úndistan, Nepal, Aýstralııa sekildi 12 eldiń de áskerıleri qyzmet ótkerip jatyr.
«Biz Golan jotalarynda ornalasqan Birikken Ulttyq Uıymy mıssııasy qolbasshysynyń re-zervi retinde qyzmet ettik. Basty maqsatymyz – Izraıl men Sırııa arasyndaǵy atysty toqtatý týraly kelisimniń saqtalýyn qadaǵalaý. Osy maqsatta bizdiń qaramaǵymyzdaǵy BUU polkposttaryn kúzetý, patrýldeý, jarylys qaýpi bar zattardy joıý, sondaı-aq BUU personaldaryn alyp júrý men evakýasııalaý jónindegi mindetterdi oryndadyq», deıdi ol.
J.Muratulynyń aıtýynsha, jergilikti halyq qazaq jaýyngerlerin «Beıbarys sultan men ál-Farabıdiń urpaqtary keldi» dep qurmetpen qarsy alǵan.
«Sırııalyqtardyń qazaqtarǵa degen kózqarasy jaqsy eken. Bizge únemi jyly iltıpat bildirip turdy. Biz ol jaqta júrip beıbitshilik degen uǵymnyń qadirin túsindik. Bul – meniń ǵana emes, birge bolǵan barlyq áriptesimniń pikiri. Eldegi búgingi tynyshtyq pen tatýlyqty baǵalaý kerek degen oı túıip qaıttyq. Kez kelgen nárseniń quny salystyrý arqyly belgili bolady ǵoı. Sırııadaǵy halyqtyń ómirin, bolyp jatqan túrli janjaldy kórip, «Jaqsy daýdan jaman bitim artyq» degen támsil eske tústi», deıdi podpolkovnık.
Sáýir aıynda elimizdiń alǵash-qy derbes ulttyq kontıngenti qaıtyp oralǵan soń, 139 adamnan turatyn ekinshi kontıngent Sırııaǵa attanǵan edi. Olardyń aldyna da birinshi quramǵa júktelgen mindetter qoıylyp otyr.
«Bizdi Joǵarǵy Bas qolbasshymyz, elimizdiń Prezıdenti Qasym-Jomart Kemeluly qabyldap, izgi sózderin arnap, keýdemizge marapat taqqany meniń ómirimdegi eń qýanyshty sáttiń biri boldy. Árbir áskerı qyzmetshi úshin eńbeginiń baǵalanǵanynan artyq syı joq. Memleket basshysyna, Qorǵanys mınıstrligi basshylyǵyna bizdi úlken qurmetpen qarsy alyp, marapattaǵany úshin jeke quramnyń atynan alǵysymdy bildiremin», dedi J.Aıypov.
Onyń aıtýynsha, shyn máninde, bir jyl boıy shet jerde júrip jınaqtaǵan tájirıbe – otandyq áskerı qyzmetshiler úshin qundy jetistik. Aldaǵy maqsat – osy tájirıbeni áskerı salaǵa engizip, izbasar jaýyngerlerdi de bitimgerlik qyzmetke baýlý. Bul armııamyzdyń kúsh-qýatyn odan ári arttyrýmen qatar, Qazaq eliniń beıbitsúıgish memleket ekenin dúnıege áıgilemek.