Jezqazǵanda Ulytaý oblysynyń Tótenshe jaǵdaılar departamenti (TJD) bólimshelerine jańa arnaıy tehnıkanyń kiltteri saltanatty túrde tabystaldy. Is-sharaǵa jergilikti ákimdik, TJ qyzmetiniń ókilderi, ardagerler, jeke quram jáne óńir turǵyndary qatysty, dep habarlaıdy Egemen.kz.
Ulytaý oblysy TJD bastyǵy polkovnık Esen Baıyrov bul jańartýdyń QR Tótenshe jaǵdaılar mınıstri, general-maıor Shyńǵys Árinovtyń tikeleı qoldaýynyń nátıjesi ekenin atap ótti.
Onyń aıtýynsha, qazirgi tańda respýblıka boıynsha qalalyq jáne aýyldyq bólimsheler úshin biryńǵaı jaraqtandyrý jáne daıyndyq standarttary engizilip jatyr.
«Bul – elimizdiń qaı túkpirinde ornalasqanyna qaramastan, barlyq bólimshelerdiń zamanaýı tehnıkamen qamtamasyz etilýin jáne halyqty qorǵaý boıynsha óz mindetterin tolyqqandy atqarýyn qamtamasyz etetin mańyzdy qadam», dedi ol.
Jańadan berilgen tehnıka tótenshe jaǵdaılarǵa der kezinde áreket etýge, ásirese shalǵaı aýyldarda jedel kómek kórsetýge zor múmkindik beredi. Bul óńirlerdegi ınfraqurylym men qyzmet sapasyn teńestirýge baǵyttalǵan naqty is-sharalarynyń biri.
Saltanatty rásim barysynda qyzmettik mindetin adal atqarǵan, kásibıligimen jáne erligimen erekshelengen qyzmetkerlerge QR TJM, oblys ákimdigi men oblystyq máslıhattyń atynan qurmet gramotalary men alǵys hattar tabys etildi.
Ulytaý oblysynyń ákimi Dastan Ryspekov quttyqtaý sózinde azamattyq qorǵaý qyzmetiniń áleýetin arttyrý turǵyndardyń qaýipsizdigin qamtamasyz etýdiń basty tetigi ekenin atap ótti. Ol tótenshe jaǵdaılar qyzmetkerlerine tabys pen jańa kásibı jetistikter tiledi.