Qazaqstan Respýblıkasy Memlekettik kúzet qyzmetiniń tý ustaýshylar toby alańǵa Memlekettik Tý men Jeńistiń Qyzyl Týyn alyp shyqty, dep habarlaıdy Egemen.kz.
Jeńistiń Qyzyl Týy – 80 jyl buryn qazaq batyry Raqymjan Qoshqarbaev pen maıdanger serigi Grıgorıı Býlatov Berlındegi Reıhstagqa tikken qasıetti týdyń kóshirmesi. Bul tý – fashızmge qarsy shaıqastaǵy halyqtyń tabandylyǵy men erliginiń sımvoly.
Surapyl soǵys jyldarynda qazaqstandyq jaýyngerler maıdannyń aldyńǵy shebinde erlikpen shaıqasty. Olardyń arasynda erekshe erlik kórsetkenderdiń biri – Raqymjan Qoshqarbaev. 1945 jyldyń 30 sáýirinde ol Berlınde Reıhstagqa Jeńis týyn alǵashqylardyń biri bolyp tikken.
Raqymjan Qoshqarbaev «Jaýyngerlik Qyzyl Tý» ordenimen marapattaldy, al 1999 jyly 7 mamyrda oǵan Qazaqstan Respýblıkasynyń joǵary nagradasy «Halyq qaharmany» ataǵy berildi.