Týrızm ındýstrııasy komıteti azamattarǵa qaýipsiz ári senimdi saıahat jasaý úshin týroperatorlar men týragentterdi durys tańdaýǵa keńes beredi, dep habarlaıdy Egemen.kz.
Resmı derekterge sáıkes, «E-lısenzııalaý» memlekettik portalynda qazirgi tańda elimizde 11 914 týragent pen 634 týroperator tirkelgen. Sonymen qatar, týrızm salasyndaǵy senimdi qyzmet kórsetýshilerdiń tizimi Týrızm ındýstrııasy komıtetiniń jáne jergilikti atqarýshy organdardyń resmı saıttarynda jarııalanǵan. Munda týroperatorlarmen qatar, gıdter, ekskýrsovodtar men týrızm nusqaýshylary da qamtylǵan.
Sarapshylardyń aıtýynsha, týrıstik kompanııaǵa júgingen kezde azamattar kompanııa ókilinen týragenttik qyzmet týraly habarlamany jáne týroperatordyń lısenzııasynyń bar-joǵyn mindetti túrde suratýy kerek. Bul — tutynýshy quqyǵyn qorǵaýdyń alǵashqy qadamy.
«Tutynýshylardy qorǵaýdyń negizgi quralynyń biri – týrıstik kod. TýrKod – bul áripter men sandardan turatyn biregeı kod, ony tekserý arqyly týrıst týroperatordyń ushý men turý shyǵyndaryn qabyldaýshy tarapqa jáne áýe kompanııasyna tólengenine kóz jetkize alady. Bul biregeı mehanızm týroperatordyń óz mindettemelerin oryndaı almaýy nemese tótenshe jaǵdaılar/oqys oqıǵalar oryn alǵan jaǵdaıda týrısterdiń elge qaıta oralýyn kepildendiredi», delingen habarlamada.
Atalǵan sharalar týrıstik saladaǵy ashyqtyqty arttyryp, azamattardyń quqyqtaryn qorǵaýǵa jáne otandyq týrıstik kompanııalarǵa degen senimdi nyǵaıtýǵa baǵyttalǵan.