ASTANA. 2 tamyz. Búginde Eýropanyń kóptegen elderi aptap ystyqtan zardap shegip otyr. Ásirese, Belgııa halqy úshin tabıǵattyń bul qubylysy aıtarlyqtaı áser etýde. Sońǵy aptada osy elde ystyq saldarynan 410 adam qaıtys boldy. Bul týraly comandir.com habarlady.
Belgııanyń Densaýlyq saqtaý jónindegi ǵylymı ınstıtýtynyń ǵalymdary aýa temperatýrasynyń kúrt artýy men ondaǵy ozon mólsheriniń shamadan tys kóp bolýy osyndaı qaıǵyly jaǵdaıǵa ákelgenin aıtýda.
Eýropada kenetten bastalǵan dál mundaı aptap ystyq sońǵy ret 2006 jyly tirkelgen. Ol kezde ystyq aýa temperatýrasy úsh apta boıy saqtalǵan.
Zertteý ortalyǵynyń mamandary habarlaǵandaı, qazirgi tańda Belgııadan bólek, Fransııa men Nıderlandyda da ystyq aýa raıy saqtalýda. Ǵalymdardyń aıtýynsha, aptap ystyq barlyq jastaǵy adamdarǵa birdeı keri áser etýde. Degenmen, 85 jastan asqan qarııalardyń kóp zardap shekkenderi baıqalady. Sebebi, qaza tapqandardyń 33 paıyzy osy býynnyń ókilderi.
Elaman Qońyr.
Derek, sýret: comandir.com.