2025 jylǵy 7 mamyr kúni, Otan qorǵaýshylar kúni men Uly Jeńistiń 80 jyldyǵyna oraı, Shyǵys Qazaqstan oblysy Ulan aýdanynyń Qasym Qaısenov aýylynda «Uly Jeńis: Erlikke taǵzym, urpaqqa úlgi» atty patrıottyq is-shara ótti, dep habarlaıdy Egemen.kz.
Is-shara barysynda Keńes Odaǵynyń Batyry, ańyzǵa aınalǵan partızan Qasym Qaısenovke arnalǵan mýral kópshilikke tanystyrylyp, soǵys jyldarynyń ánderi shyrqalǵan. Jıynnyń resmı ashylýy Memlekettik gımnmen bastalyp, oblys ákimi Nurymbet Saqtaǵanov qatysýshylardy quttyqtady.
«Eskertkish stela – Uly Otan soǵysy men Aýǵan soǵysy ardagerleriniń rýhyna degen máńgilik taǵzym. Jas urpaq osyndaı erlerdiń erligine qarap, Otanǵa qyzmet etýdiń qadirin túsinýi tıis. Búgingi jaýyngerler de sol batyrlardyń jolyn laıyqty jalǵastyrady dep senemin», dedi oblys basshysy.
Oblysta olardyń esimderin máńgi este qaldyrý boıynsha birqatar jumystar atqarylyp jatyr. Bıyldyń ózinde 6 eskertkish jańartylyp, Qasym Qaısenovke arnalǵan mýral salynǵan.
Sharaǵa qatysqan Halyq Qaharmanynyń uly Bolat Qaısenov pen aýdandyq ardagerler keńesiniń tóraǵasy Aımuhambet Bakımbaevtyń sózderi jınalǵan qaýymǵa erekshe áser etti. Jıyn Uly Otan soǵysynda qaza tapqan jaýyngerlerdi bir mınýt únsizdikpen eske alýmen aıaqtalǵan.