Energetıka vıse-mınıstri Álibek Jamaýov jumys saparymen «Beıneý–Bozoı–Shymkent» magıstraldyq gaz qubyrynyń ekinshi jelisin salý josparlanǵan ýchaskege bardy. Sapar maqsaty – elimizdiń energetıkalyq ınfraqurylymyndaǵy strategııalyq mańyzdy jobalardyń biri boıynsha qurylys jumystaryna daıyndyq barysyn kózben kórip, baqylaý, dep jazady Egemen.kz
Vıse-mınıstr jumys barysynda qurylys-montaj kezeńderimen jan-jaqty tanysyp, merdiger uıym ókilderimen keńes ótkizdi. Keńes barysynda jobanyń iske asyrylý kestesi, materıaldyq-tehnıkalyq qamtamasyz etý, logıstıkalyq uıymdastyrý, sondaı-aq jergilikti atqarýshy organdarmen ózara is-qımyl máseleleri jan-jaqty qarastyryldy.
«Beıneý–Bozoı–Shymkent» gaz qubyrynyń ekinshi jelisiniń iske qosylýy – Qazaqstannyń energetıkalyq qaýipsizdigin nyǵaıtýǵa baǵyttalǵan mańyzdy qadam. Bul – otyn-energetıka kesheniniń turaqty damýyn qamtamasyz etetin memlekettik saıasattyń basym baǵyty», dedi Energetıka vıse-mınıstri Álibek Jamaýov.
Joba eki kezeńde júzege asyrylady. Onyń nátıjesinde magıstraldyq gaz qubyrynyń jalpy ótkizý qabileti jylyna 15 mıllıard tekshe metrge deıin ulǵaıady. Bul elimizdiń ońtústik, ortalyq jáne soltústik aımaqtaryn turaqty ári senimdi gazben qamtýǵa múmkindik bermek.
Aıta ketý kerek, atalǵan joba Qazaqstan Úkimeti men Qatar Memleketi Úkimeti arasyndaǵy kelisim aıasynda júzege asyrylady. Qurylysqa katarlyq ınvestor tartylyp otyr. Qazaqstan tarapy, sonyń ishinde QazaqGaz ulttyq kompanııasy arqyly sheteldik serikteske jobany oıdaǵydaı iske asyrý úshin barlyq qajetti jaǵdaıdy jasap otyr.