1995 jyly Qazaqstannyń belgili jazýshysy ári batyr partızany Qasym Qaısenovke eldegi eń joǵary marapat — «Halyq qaharmany» ataǵy berildi. Bul jańalyqty estigende, temirdeı tózimdiligimen tanylǵan jaýyngerdiń kózine jas kelgen edi. Ol jylady. Biraq bul álsizdikten emes, júregindegi jyldar boıǵy arman men ádilettiń saltanat qurýynan týǵan kóz jasy bolatyn, dep jazady Egemen.kz.
Qasym Qaısenov — Ekinshi dúnıejúzilik soǵysta Ýkraına, Moldavııa, Rýmynııa jerinde partızandyq qozǵalysty uıymdastyryp, basqarǵan qazaqtyń qaısar tulǵasy. Ol soǵystan aman oralyp, elge kelgen soń óz erligi jaıly jazyp, birneshe urpaqty patrıottyq rýhta tárbıelegen qalamger de boldy. Dese de, onyń maıdandaǵy janqııar eńbegi uzaq jyldar boıy eskerýsiz qaldy.
Sol jyldar jaıly Qaısenovtiń ózi bylaı dep eske alady:
«Bir kúni meniń kabınetime azdap iship alǵan Raqymjan keldi. Ol kezde «Jazýshy» baspasynda dırektordyń orynbasarymyn. «Qasym aǵa, bul ne boldy? Meniń geroı ataǵymdy bermedi» dep qatty kúıinip keldi. Men ornymnan turyp, esikti jaýyp, oǵan: «Áı, Raqymjan, seniń mynaýyń durys emes, qarǵam. Biz bárimiz de Otan qorǵaýǵa attandyq. Bizge orden-medal emes, tipti raqmet aıtýdyń da keregi joq. Biz azamattyq boryshymyzdy ótedik. Mynaýyń uıat boldy, qarǵam» dedim. Sodan keıin qushaqtap, betinen súıdim. Ol maǵan: «Qasym aǵa, bunyńyz durys eken» dedi».
Bul — Qaısenovtiń tek maıdanger ǵana emes, rýhanı ustaz bolǵanyn kórsetedi. Búginde aty ańyzǵa aınalǵan Raqymjan Qoshqarbaevtyń jan kúızelisi men Qaısenovtiń aǵalyq parasaty – qazaq rýhynyń tereń bir kórinisi.
Jyldar ótip, aqyry ádildik saltanat qurǵan shaqta Qasym Qaısenovtiń de eńbegi elendi. Biraq dál sol sát – marapatty keýdesine taqqan mezet – batyrdyń júreginde qýanysh emes, aýyr kúrsinispen este qaldy.
«Úıge keldim. Esikti ishten bekitip, bir bokal konıakti iship alyp, qatty jyladym. О́zimdi sol nagradany ádeıi kútkendeı sezindim. Shyn máninde, bul juldyzdyń maǵan keregi joq edi. Maǵan «partızan Qasym Qaısenov» degen ataqtyń ózi jetetin. Keıin Raqymjanǵa «Halyq qaharmany» ataǵyn bergen kúni taǵy da jyladym. О́ıtkeni az da bolsa onyń arýaǵy aldynda arym tazarǵandaı boldy…», dep kúrsindi Q.Qaısenov.
Qasym Qaısenovtiń bul sózderi — onyń bıik rýhynyń, qarapaıym bolmysynyń jáne shynaıy patrıotızmniń dáleli.
Búgin biz batyrdyń jan syryn oqı otyryp, naǵyz erliktiń ne ekenin, marapattyń shyn salmaǵy qaı kezde seziletinin uǵamyz. Qaısenov úshin «Halyq qaharmany» ataǵy – keshigip kelgen shyndyq edi. Biraq sol shyndyqty ol ózinen buryn ómirden ótken arýaqtardyń atynan qabyldady.
Qasym Qaısenov — el esinde erligimen de, qalamgerligimen de saqtalǵan tulǵa. Onyń ómir joly jas urpaqqa úlgi bolarlyq.