Bıyl jaz mezgilinde elimizdiń túkpir-túkpirinde 3,1 mıllıonnan astam oqýshynyń demalysy, saýyqtyrylýy jáne eńbekke beıimdelýi uıymdastyrylady. Josparlanǵan is-sharalar balalardyń belsendi demalysyn qamtamasyz etip qana qoımaı, olardyń shyǵarmashylyq, zııatkerlik qabiletterin damytýǵa jáne áleýmettik beıimdelýine baǵyttalǵan, dep jazady Egemen.kz.
Osy naýqan aıasynda áleýmettik osal sanattaǵy otbasylardan shyqqan 500 myńnan astam bala túrli baǵyttaǵy baǵdarlamalarmen qamtylady. Buǵan qosa, «Qazaqstan halqyna» qoǵamdyq qorynyń qoldaýymen taǵy 10 myń oqýshyǵa tegin demalys múmkindigi beriledi.
Jazǵy baǵdarlamanyń mazmuny keń ári jan-jaqty. Balalar eńbek pen shyǵarmashylyq baǵyttaǵy jobalarǵa, týrıstik-tanymdyq saparlarǵa, bilim berý is-sharalaryna, sondaı-aq halyqaralyq forýmdar men baıqaýlarǵa qatysa alady. Bul baǵyttaǵy jumystar toǵyz mınıstrliktiń úılestirýimen ázirlengen biryńǵaı jospar aıasynda iske asyrylýda. Respýblıkalyq jáne óńirlik deńgeıde arnaıy shtabtar qurylyp, demalys ortalyqtarynyń tolyq tizimi jasaqtalǵan.
Balalardyń qaýipsiz demalysyn qamtamasyz etý basty nazarda tur. Lagerlerdegi sanıtarlyq jaǵdaılar, taǵam sapasy, sý jaǵalaýlaryndaǵy jáne sporttyq alańdardaǵy qaýipsizdik talaptary qatań qadaǵalanady. Sonymen qatar, ata-analar men balalar úshin arnaıy jadynamalar, qaýipsizdik boıynsha nusqaýlyqtar men gaıdbýktar daıyndalyp, taratylmaq.
Bıyl óńirlerde «Kıeli Shyǵys», «Uly Dala keremeti», «Jas galym», «Gastro týrızm», «Qonaqjaı otbasy» sııaqty birqatar jańa formattaǵy jobalar iske asyrylady.
Jalpy, jaz mezgilinde respýblıka kóleminde jyl boıy úzdiksiz jumys isteıtin 16 lager, 188 maýsymdyq lager, 10 myńnan astam mektep janyndaǵy alań jáne 512 shatyrly men kıiz úı tıpindegi lager kezeń-kezeńimen ashylady dep josparlanyp otyr. Olardyń basym bóliginde balalar úshin ystyq tamaqpen qamtý qarastyrylǵan.