Máskeýde Qazaqstan Prezıdenti Qasym-Jomart Toqaev pen Venesýela Prezıdenti Nıkolas Madýro kezdesý ótkizdi.
Memleket basshysy mártebeli meımanǵa iltıpat bildirip, elimizdiń Uly Jeńiske qosqan úlesi jaıynda aıtty. Prezıdent Qazaqstannan maıdanǵa 1,2 mıllıon adam attanyp, olardyń jartysy erlikpen qaza tapqanyn jetkizdi.
Qasym-Jomart Toqaev Venesýelany elimizdiń mańyzdy seriktesi retinde qarastyratynyn atap ótti. Sonymen qatar belgili sebepterge baılanysty osy ýaqytqa deıin ekijaqty yntymaqtastyq oıdaǵydaı óristemegenine nazar aýdardy.
Osy oraıda Nıkolas Madýrony ózara yqpaldastyqty talqylaý úshin Qazaqstanǵa memlekettik saparmen kelýge shaqyrdy.
Venesýela Prezıdenti eki el arasyndaǵy baılanystardyń jaı-kúıin pysyqtaýǵa múmkindik týǵanyna qýanyshty ekenin jetkizdi. Onyń aıtýynsha, Uly Jeńistiń 80 jyldyǵyn merekeleýdiń jahandyq mańyzy zor. Nıkolas Madýro Keńes Odaǵynyń quramynda bolǵan halyqtar Jeńiske jetý jolynda negizgi ról atqarǵanyna toqtaldy.
Áńgimelesý barysynda ekonomıkalyq qarym-qatynasty damytýǵa, sonyń ishinde energetıka salasyndaǵy yntymaqtastyqqa mán berildi.
Kezdesý qorytyndysy boıynsha saýda-sattyqty jandandyrý maqsatynda eksportqa laıyq ónimderdiń tizbesin ázirleý jáne ózara almasý, eki eldiń iskerlik ortalary arasynda naqty yqpaldastyq ornatý jónindegi ýaǵdalastyqqa qol jetkizildi.