Mádenıet jáne aqparat mınıstri Aıda Balaeva Facebook paraqshasynda, Prezıdenttiń bastamasymen júzege asyrylyp jatqan «Ańsaǵan sábı» baǵdarlamasy reprodýktıvti densaýlyq salasyndaǵy memlekettik saıasattyń mańyzdy quramdas bóligine aınalǵanyn jazdy, dep habarlaıdy Egemen.kz.
Jasóspirimder men jastar arasynda reprodýktıvti densaýlyqqa jaýapkershilikpen qaraý mádenıetin qalyptastyrý, jynystyq qatynasqa erte túsý saldarlary, jynystyq jolmen beriletin ınfeksııalardyń taralýy jáne AITV juqtyrǵan jańa jaǵdaılardyń kóbeıýiniń aldyn alý maqsatynda 12-16 mamyr aralyǵynda elimizde reprodýktıvti densaýlyq aptalyǵy ótedi.
Aıta ketsek, atalǵan bastamanyń negizgi uıymdastyrýshysy – Prezıdent janyndaǵy Áıelder isteri jáne otbasylyq-demografııalyq saıasat jónindegi ulttyq komıssııa.
«Búginde bul máselelerdi ashyq, ǵylymı negizde jáne kásibı deńgeıde talqylaý burynǵydan da mańyzdy. О́tken jylǵy tájirıbe bul bastamanyń qoǵam úshin ózekti ári qajetti ekenin kórsetti. Sondyqtan biz aptalyqty jyl saıyn ótkizý týraly sheshim qabyldadyq», dep jazdy Aıda Balaeva.
Mınıstrdiń jazýynsha, aksııa aıasynda halyqtyń densaýlyǵyn nyǵaıtý, adam aǵzasyna jáne bolashaǵyna sanaly kózqaras qalyptastyrý baǵytynda memlekettik organdardyń, densaýlyq saqtaý jáne bilim berý uıymdarynyń, úkimettik emes uıymdar men halyqaralyq seriktesterdiń kúsh-jigeri biriktiriledi.
Osy oraıda Mádenıet jáne aqparat mınıstri kásibı qaýymdastyqtardy, buqaralyq aqparat quraldaryn jáne qoǵamdyq pikir kóshbasshylaryn aqparattyq naýqandy qoldaýǵa shaqyryp otyr.
Apta aıasynda elimizdiń barlyq óńirindegi jastar densaýlyq ortalyqtarynda jáne bastapqy medısınalyq-sanıtarlyq kómek uıymdarynda ashyq esik kúnderi, taqyryptyq dárister, trenıngter, ınteraktıvti sessııalar men mamandardyń qatysýymen onlaın-vebınarlar uıymdastyrylady.
Qazirgi ýaqytta elimizde 10–29 jas aralyǵyndaǵy jasóspirimder men jastarǵa medısınalyq jáne profılaktıkalyq kómek, psıhologtardan, áleýmettik qyzmetkerler men zańgerlerden keńes alýǵa múmkindik beretin 103 jastar densaýlyq ortalyǵy jumys isteıdi.