Bekire berik baqylaýda bolmaq

«Bekire-2015» aksııasy bastalǵaly, 1 sáýirden beri qaraı 226 tabıǵat qorǵaý zańnamasynyń buzylǵandyǵy anyqtalsa, onyń ishinde balyqty zańsyz aýlaýdyń – 198, balyqty zańsyz tasymaldaýdyń 20 faktisi tirkelgen. Atalǵan zań buzýshylyq boıynsha ákimshilik jaýapkershilikke 171 adam tartylǵan. Sondaı-aq, 28 qylmystyq is qozǵalyp, 51 materıal sot organdaryna joldandy. Bul jóninde Prezıdent ja­nyndaǵy Ortalyq kommýnıkasııalar qyzmetinde ótken brıfıngte Aýyl sharýashylyǵy vı­se-mınıstri Erlan Nysanbaev málimdedi. Onyń aıtýynsha, balyq qorǵaý ınspektorla­ry brakonerlerden 27 tonna balyq, onyń ishinde, 1 tonna bekire balyǵy, shamamen 18 kı­lo ýyldyryq, 1200 balyq aýlaý men 176 júzý quraldaryn tárki­legen. Jalpy, memleket boıynsha balyq qorǵaý ınspektorlary 2014 jyly ákimshilik quqyq buzý­shylyq týraly 6764 hattama tol­tyryp, 979 quqyq buzýshy ákim­shilik jaýapkershilikke tartyldy, 50 adam sotpen qylmystyq jaý­apkershilikke jazalandy, dedi E.Nysanbaev. Sonymen qatar, bekire ba­ly­ǵyn zańsyz aýlaǵany úshin 2000 eń tómengi eseptik kórsetkish kóleminde aıyppul nemese 2 jylǵa deıin bas bostandyǵynan aıyrý qarastyrylyp otyrǵanyn atap ótti. Jáne de osyndaı zań buzýshylyq aıasynda tabıǵatqa kólemdi zalal keltirilgen jaǵ­daı­da, sondaı-aq balyq aýlaý uıym­dasqan túrde iske assa, ol kezde 2 jyldan 5 jylǵa deıin bas bos­tandyǵynan aıyrý jazasy qolda­nylatyn bolady, dedi vıse-mınıstr. Respýblıkada 35-ke jýyq ba­lyq ósirý kásiporyndary bar. Agroónerkásiptik keshen­di damytýǵa arnalǵan «Agro­bız­nes-2020» baǵdarlamasynda taýarlyq balyq ósirýdi damytý úshin memlekettik qoldaý sharalary qarastyrylǵan, deı kele vıse-mınıstr Kaspıı teńiziniń bıologııalyq resýrstaryn, ásirese, bekire tuqymdas balyq túrlerin saqtaýǵa zor mán berilip otyrǵandyǵyn kóldeneń tartty. Osyǵan baılanysty 2010 jyly Kaspıı teńizimen shekaralas memleketterdiń úshinshi Sammıti ótkennen keıin Elbasy Nursultan Nazarbaev Kaspıı teńiziniń sý bıologııalyq resýrs­taryn utymdy paıdalaný jáne saqtaý kelisimin talqylaýdy jal­ǵastyrýdy, sondaı-aq 5 jyl merzimge deıin Kaspııde bekire balyǵyn kommersııalyq aýlaýǵa moratorıı engizý mehanızmin ázirleýdi tapsyrǵan bolatyn, dedi. Osynyń aıasynda ótken jyldyń qyrkúıek aıynda Astrahan qalasynda bul kelisimge Kaspıı teńizimen shekaralas 5 memleket qol qoıdy. Balyq sharýashylyǵyn odan ári damytý, qoldanystaǵy normatıvtik-quyqtyq bazany jetildirý maqsatynda, Úkimettiń 2015 jylǵy zań jobalary jos­paryna sáıkes mınıstrlik Qa­zaqstan Respýblıkasynyń keı­bir zańnamalyq aktilerine ósim­dikter men janýarlar dúnıesi máseleleri boıynsha ózgerister men tolyqtyrýlar engizý týraly zań jobasyn ázirledi. Qujat Kaspıı teńiziniń sý bıologııalyq resýrstaryn utymdy paıdalaný jáne saqtaý máselesin, sondaı-aq, ortaq bıologııalyq resýrstardy basqarýdy retteıdi. Qazirgi tańda elimizdiń Aýyl sharýashylyǵy mınıstrligi kelisimniń kúshine enýine qajetti rásimder ázirleýde, dedi E.Nysanbaev. Elmıra MÁTIBAEVA, «Egemen Qazaqstan».