Astana qalasy kámeletke tolmaǵandardyń isteri jónindegi mamandandyrylǵan aýdanaralyq sotynda lıftide balany pyshaqtaǵan jasóspirimniń isi qaraldy, dep jazady Egemen.kz aqparat agenttigi.
Jasóspirim psıhonevrologııalyq dıspanserde esepte turatyndyqtan májbúrlep emdeýge jiberiletin boldy.
- Astana qalasynyń kámeletke tolmaǵandardyń isteri jónindegi mamandandyrylǵan aýdanaralyq sotyna 14 jasar K.- ge qatysty medısınalyq sıpattaǵy májbúrleý sharalaryn qoldaný týraly qaýlysy bar qylmystyq is kelip tústi (QK 293-baby 3-bóligi 2)tarmaǵy). Sot K.-nyń II toptaǵy múgedek ekenin, psıhonevrologııalyq dıspanserde esepte tura otyryp, 2025 jylǵy 11 aqpanda turǵyn úı kesheniniń lıftinde bolǵan kezde kámeletke tolmaǵan adamǵa ıaǵnı E.-niń denesine zaqym keltirip, onyń betine pyshaqpen jaraqat salǵanyn anyqtady, - delingen sot habarlamasynda.
Sot psıhologııalyq-psıhıatrııalyq saraptamanyń qorytyndysyna sáıkes jasóspirim sozylmaly psıhıkalyq aýrýdyń saldarynan, áreket kezeńinde óziniń is-qımylynyń naqty sıpaty men áleýmettik qaýiptiligin túsinbegen jáne olardy basqara almaǵan, psıhıkalyq jaǵdaıy boıynsha ózine jáne qoǵamǵa qaýip tóndirgen.
Ol májbúrlep emdeýdi qajet etedi.
QK 16-babynyń talaptaryna sáıkes, qoǵamǵa qaýipti is-áreket jasaǵan ýaqytta esi durys emes kúıde bolǵan adam qylmystyq jaýaptylyqqa tartylmaıdy.
Esi durys emes dep tanylǵan adamǵa sot medısınalyq sıpattaǵy májbúrleý sharalaryn qoldana alady.
- Sot qaýlysyna sáıkes, K.-ge Talǵar aýdany Aqtas aýylyndaǵy qarqyndy baqylanatyn mamandandyrylǵan úlgidegi mekemede stasıonarlyq májbúrlep emdeý taǵaıyndaldy, - dep habarlady sottan.
Qaýly zańdy kúshine engen joq.