Birikken Arab Ámirlikteriniń taq murageriniń Qazaqstan Respýblıkasyna resmı sapary aıasynda iri halyqaralyq saýda jelisiniń biri – LuLu Group International kompanııasymen qazaqstandyq taraptyń strategııalyq kezdesýi ótti. QR Saýda jáne ıntegrasııa mınıstri Arman Shaqqalıev pen Aýyl sharýashylyǵy mınıstri Aıdarbek Saparov LuLu kompanııasynyń dırektorlar keńesiniń tóraǵasy Iýsýf Álı Mýsalıam Vıttıl Abdýl Kadermen kelissózder júrgizdi, dep habarlaıdy Egemen.kz.
LuLu Group – BAÁ, Saýd Arabııasy, Katar jáne Parsy shyǵanaǵynyń basqa da elderinde 280-nen astam gıpermarketter jelisin basqaratyn jetekshi rıteıler. Kompanııa Qazaqstanmen birlesken jobalardy iske asyrýǵa joǵary qyzyǵýshylyq bildirip, aýyl sharýashylyǵy ónimderin – sıyr eti, qoı eti, qus eti, jumyrtqa, sút ónimderi, astyq pen jemisterdi eksporttaý máselelerin talqylady. Sonymen qatar, et óńdeý jáne jemis ónimderin óńdeý salalaryndaǵy birlesken óndiris perspektıvalary qaraldy.
Qazaqstan tarapy LuLu kompanııasyna elimizde logıstıkalyq hab qurýdy usyndy. Bul ortalyqta ónimdi suryptap, qaptap, eksporttyq partııalarǵa daıyndaý júzege asyrylyp, ony Parsy shyǵanaǵy elderi men ózge de halyqaralyq naryqtarǵa jedel jóneltý múmkindigi paıda bolady.
Mınıstrler LuLu jobasyn júzege asyrýda jan-jaqty qoldaý kórsetýge daıyn ekendikterin málimdedi. Atap aıtqanda, ınfraqurylymdy qamtamasyz etý, logıstıkany uıymdastyrý jáne memlekettik organdar tarapynan qajetti kómekti usyný sharalary usynyldy.
Bul kezdesý Qazaqstan úshin eksporttyq áleýetti kúsheıtýge jáne otandyq ónimderdi álemdik naryqqa shyǵarýǵa baǵyttalǵan mańyzdy qadam boldy. Qazaqstan tarapy LuLu Group-pen odan ári praktıkalyq yntymaqtastyqty damytýǵa múddeli ekenin rastady.