AQSh pen Saýd Arabııasy Donald Tramptyń Taıaý Shyǵysqa jasaǵan resmı sapary aıasynda jalpy quny 600 mıllıard AQSh dollaryn quraıtyn birqatar kelisimge qol qoıdy, dep jazady Egemen.kz DW aqparattyq agenttigine silteme jasap.
Aq úı taratqan málimetke sáıkes, kelisimderdiń ishinde quny 142 mıllıard dollarǵa baǵalanǵan qorǵanys ónimderin satý týraly tarıhı kelisim bar. Bul AQSh tarıhyndaǵy eń iri áskerı-ónerkásiptik mámile retinde sıpattalyp otyr.
Mámile sheńberinde Saýd Arabııasyna amerıkalyq ondaǵan qorǵanys kompanııasynyń qatysýymen zamanaýı áskerı tehnıka men qyzmetter jetkiziledi. Olardyń qatarynda áýe shabýylyna qarsy jáne zymyranǵa qarsy qorǵanys júıeleri, áskerı-áýe kúshteri men ǵaryshty ıgerý salalary, teńiz jáne shekara qaýipsizdigi, sondaı-aq aqparattyq-kommýnıkasııalyq júıelerdi damytý baǵyttary qamtylǵan.
Sonymen qatar, kelisim aıasynda Saýd Arabııasynyń Qarýly kúshteriniń áleýetin arttyrýǵa baǵyttalǵan keshendi oqý-jattyǵý baǵdarlamalary qarastyrylǵan. Bul baǵdarlama áskerı akademııalar men áskerı-medısınalyq qyzmetterdiń bazasyn kúsheıtýdi de qamtıdy.
Aq úı taratqan qosymsha aqparatqa sáıkes, bul mámile Er-Rııadtyń AQSh ekonomıkasyna 600 mıllıard dollar ınvestısııa salý jónindegi strategııalyq josparynyń bir bóligi sanalady. Saýd Arabııasy tarapynan júzege asyrylatyn ınvestısııalar jasandy ıntellektke negizdelgen derekterdi óńdeý ortalyqtaryn qurýǵa baǵyttalady. Atap aıtqanda, DataVolt kompanııasy Amerıka aýmaǵynda data-ortalyqtar men energetıkalyq ınfraqurylym salýǵa 20 mıllıard dollar ınvestısııa salmaq.
О́z kezeginde amerıkalyq tehnologııalyq alpaýyttar — Google, Oracle, Salesforce jáne Uber — eki el arasyndaǵy ınnovasııalyq yntymaqtastyq aıasynda 80 mıllıard dollardy quraıtyn ınvestısııalyq jobalarǵa qatysady. Bul qarajat negizinen transformasııalyq tehnologııalardy damytýǵa jumsalmaq.
Sondaı-aq, kelisim sheńberinde Saýd Arabııasynyń AviLease kompanııasy Boeing áýe kemelerin satyp alý maqsatynda 4,8 mıllıard dollarlyq kelisim jasasqany málim boldy.