Armenııa Respýblıkasy Ulttyq jınalysynyń tóraǵasy Alen Sımonıan resmı saparmen elimizge kelip, Májilis tóraǵasy Erlan Qoshanovpen kezdesti. Joǵary mártebeli meımandy Májilis úıinde qarsy alǵan spıker bul sapardy Ońtústik Kavkazdaǵy senimdi áriptespen aradaǵy qarym-qatynasty tereńdetýdiń aıǵaǵy dep baǵalady, dep jazady Egemen.kz.
Májilis spıkeri bizdiń elimiz Armenııa basshylyǵy júzege asyryp jatqan aýqymdy saıası, ekonomıkalyq jáne áleýmettik reformalardy úlken qyzyǵýshylyqpen baqylap otyrǵanyn aıtty.
«Byltyr Qazaqstan men Armenııa arasyndaǵy dostyq jáne yntymaqtastyq týraly sharttyń 25 jyldyǵyn atap óttik. Bul mereıtoıǵa oraı memleket basshylarynyń resmı saparlar almasýynyń sımvoldyq máni zor. Bul eki mańyzdy oqıǵa jańa geosaıası jaǵdaılardaǵy memleketterimiz arasyndaǵy yntymaqtastyqqa qýatty qarqyn berdi. Onda áriptestigimizdiń barlyq salalaryn qamtıtyn birqatar kelisimge qol qoıyldy», dedi Erlan Qoshanov.
Taraptar byltyr eki el arasyndaǵy dostyq jáne yntymaqtastyq týraly sharttyń 25 jyldyǵy atap ótilgenin, osyǵan oraı memleket basshylarynyń resmı saparlarmen almasýy memleketaralyq baılanysty jańa deńgeıge kótergenin atap ótti. Sol kezdesýler nátıjesinde ekijaqty seriktestikti qamtıtyn mańyzdy kelisimderge qol qoıylǵan bolatyn.
Kezdesýde parlament tóraǵalary joǵary deńgeıde jasalǵan kelisimderdiń zańdyq negizin bekitý máselelerin sóz etti. Sonymen qatar taraptar jańa ekonomıkalyq, mádenı jáne gýmanıtarlyq jobalardy qoldaýǵa daıyn ekenderin bildirdi. Erlan Qoshanov armıan áriptesin elimizde júrip jatqan reformalarmen tanystyryp, áleýmettik ádilet, zań ústemdigi men qoǵamdyq tártipti nyǵaıtýǵa baǵyttalǵan zańdar týraly aqparat berdi. Bul bastamalar Armenııa tarapynan da qyzyǵýshylyq týdyryp otyr.
Sondaı-aq eki el depýtattary profıldik komıtetter arqyly zań shyǵarý tájirıbesimen almasýǵa ýaǵdalasty.
Ulttyq jınalys tóraǵasy Alen Sımonıan parlamentaralyq baılanystyń mańyzdylyǵyna toqtalyp, sáýir aıynda ótken Qazaqstan mádenıeti kúnderiniń Armenııa jurtshylyǵy úshin úlken oqıǵa bolǵanyn erekshe atap ótti. Onyń aıtýynsha, mundaı sharalar halyqtar arasyndaǵy ózara túsinistik pen dostyqty arttyra túsedi.
«Armenııa Qazaqstan bıligi men halqynyń armıan dıasporasyna degen kózqarasyn joǵary baǵalaıdy. Bul – memleketterimiz ben halyqtarymyz arasyndaǵy mańyzdy dáneker», dedi Alen Sımonıan.
Kezdesý sońynda taraptar logıstıka, ekonomıka jáne mádenı-gýmanıtarlyq saladaǵy yntymaqtastyqty odan ári damytý máselelerin jan-jaqty talqylady.