Májilis depýtattary «2009 jylǵy 9 maýsymdaǵy Eýrazııalyq turaqtandyrý jáne damý qoryn qurý týraly shartqa ózgerister engizý týraly hattamany ratıfıkasııalaý týraly» zań jobasyn qarady, dep jazady Egemen.kz.
Atalǵan halyqaralyq sharttyń maqsaty – Eýrazııalyq turaqtandyrý jáne damý qoryn (ETDQ) derbes halyqaralyq uıym retinde qaıta qurý. Bul ózgerister Qordyń qazirgi mártebesin keńeıtýge, ony Eýrazııalyq keńistiktegi neǵurlym tıimdi jáne yqpaldy qarjy quralyna aınaldyrýǵa baǵyttalǵan.
Qarjy jáne bıýdjet komıteti daıyndaǵan qorytyndyda kórsetilgendeı, zań jobasy Úkimettiń 2024 jylǵy 28 qazandaǵy №896 qaýlysyna sáıkes Májiliske engizilgen. Qordyń quramyna Qazaqstannan bólek Belarýs, Qyrǵyzstan, Reseı, Tájikstan jáne Armenııa memleketteri kiredi. Al onyń qarajatyn basqarý mindeti Eýrazııalyq damý bankine júktelgen.
Jańa hattama aıasynda ETDQ-ny Eýrazııalyq damý bankinen ınstıtýsıonaldy túrde bólip shyǵarý kózdelgen. Bul shara, eń aldymen, sanksııalyq táýekelderdi azaıtýǵa jáne qatysýshy elder arasyndaǵy yntymaqtastyqty keńeıtýge múmkindik beredi. Sondaı-aq, hattamada ulttyq valıýtalarmen esep aıyrysý mehanızmin engizý, tehnıkalyq kómek kórsetý, trast-qorlar arqyly qarjy bólý syndy jańa quraldardy paıdalaný qarastyrylǵan.
Búginde qor qarjylyq jáne ınvestısııalyq kredıtter men granttar berý arqyly qatysýshy memleketterdiń ekonomıkalyq turaqtylyǵyn qamtamasyz etýge baǵyttalǵan. Aldaǵy ózgerister osy quraldardy tolyqtyryp, qor qyzmetiniń tıimdiligin arttyrady.
Komıtet óz qorytyndysynda zań jobasyn qabyldap, ony Parlament Májilisiniń jalpy otyrysynyń qaraýyna usynýdy jón dep tapty. Qujatty Májilistegi barlyq komıtetter qoldap otyr.
Bul hattamanyń ratıfıkasııasy Qazaqstannyń óńirlik qarjylyq qurylymdarmen baılanysyn nyǵaıtyp qana qoımaı, ulttyq múddeni qorǵaýǵa baǵyttalǵan jańa tetikterdi iske asyrýǵa jol ashady. Eýrazııalyq keńistiktegi ekonomıkalyq yqpaldastyqtyń jańa kezeńi bastalǵaly tur.