2025 jylǵy 14 mamyrda Túrkistan qalasynda Túrki memleketteri uıymyna (TMU) múshe elderdiń ortalyq saılaý organdary arasynda ózara is-qımyldy kúsheıtýge baǵyttalǵan mańyzdy qujat – Konsýltatıvtik platforma (OSO KP) týraly Erejege qol qoıý rásimi ótti, dep habarlaıdy Egemen.kz.
Is-sharaǵa Ázerbaıjan, Qazaqstan, Qyrǵyzstan, Túrkııa, О́zbekstan jáne baqylaýshy el – Majarstannyń ortalyq saılaý organdarynyń ókilderi qatysty. Sonymen qatar, bedeldi halyqaralyq uıymdar – TMU, A-WEB (Saılaý organdarynyń dúnıejúzilik qaýymdastyǵy), TúrkPA jáne Túrki akademııasy basshylary, sondaı-aq qazaqstandyq parlament depýtattary, sarapshylar men óńirlik saılaý komıssııalarynyń tóraǵalary bas qosqan.
Túrki memleketteri uıymyna múshe memleketterdiń ortalyq saılaý organdarynyń konsýltatıvtik platformasyn qurý bastamasyn Qazaqstan Respýblıkasynyń Prezıdenti Qasym-Jomart Toqaev 2023 jylǵy 3 qarashada Astanada ótken TMU X mereıtoılyq sammıtinde usynǵan bolatyn.
TMU múshe memleketterdiń ortalyq saılaý organdarynyń konsýltatıvtik platformasyn qurý týraly sheshim barlyq túrki memleketter basshylary tarapynan biraýyzdan qoldaý taýyp, 2024 jylǵy 6 qarashada qabyldanǵan TMU XI sammıtiniń Bishkek deklarasııasynda kórinis tapty.
OSO KP Erejesine qol qoıý rásiminde QR Ortalyq saılaý komıssııasynyń Tóraǵasy Nurlan Ábdirov Memleket basshysy Qasym-Jomart Toqaevtyń is-sharaǵa qatysýshylarǵa arnaǵan quttyqtaý hatyn oqydy.
Prezıdent óz hatynda TMU X sammıtinde usynǵan konsýltatıvtik platformany qurý týraly bastamany qoldaǵan baýyrlas elderdiń áriptesterine alǵys bildirip, bul bastama uıymnyń múshe memleketteriniń saılaý júıelerin jetildirýge yqpal etetine senim bildirdi.
«Búkil Túrki áleminiń rýhanı astanasy sanalatyn Túrkistan qalasynda konsýltatıvtik platformanyń erejesine qol qoıylady. Munyń sımvoldyq máni zor. Sondaı-aq máseleniń mańyzdylyǵyn eskere otyryp, men «Túrki álemi: saılaý júıeleriniń dástúri, tájirıbesi jáne damý bolashaǵy» atty ǵylymı-tájirıbelik konferensııa ótkizý týraly bastamany qoldaımyn. Bul sharalar tarıhy ortaq, tamyry bir baýyrlas elderdiń qarym-qatynasyn odan ári tereńdete túseri sózsiz», dep Memleket basshysy óz hatynda den qoıyp, konsýltatıvtik platformaǵa nátıjeli jumys tiledi.
Sonymen qatar, QR Parlamenti Senatynyń Tóraǵasy Máýlen Áshimbaev pen QR Parlamenti Májilisiniń Tóraǵasy Erlan Qoshanov óz quttyqtaýlaryn joldaǵan.
Is-shara barysynda QR OSK Tóraǵasy ashyq derekterge sáıkes TMU múshe memleketterde 96,5 mıllıonnan astam saılaýshy bar ekenin, sońǵy eki jylda osy elderde túrli deńgeıdegi 15 saılaý ótkenin atap ótti. Sonymen qatar, ol «biz búgin búkil túrki halqynyń rýhanı astanasy – Túrkistanda jınalyp, TMU elderiniń ortalyq saılaý organdarynyń Konsýltatıvtik platformasy týraly Erejege qol qoıyp otyrmyz. Mundaı dıalog alańyn qurý saılaý prosesteriniń sapasy, tıimdiligi men ınklıýzıvtiligin arttyrýǵa yqpal etedi», dedi.