Qaraǵandy oblysy Nura aýdany Kóbeteı aýylynda 1100 basqa arnalǵan sút-taýar fermasy ashyldy. Nysan eýropalyq standarttar boıynsha jabdyqtalǵan jáne óńirdegi eń iri nysandardyń birine aınalady, dep jazady Egemen.kz.
Investısııalyq jobany «Ramadan MF» JShS «Chernıgovskoe ı K» aýylsharýashylyq kásipornymen birlesip júzege asyrdy. Tolyq qýattylyqqa shyqqan kezde jylyna shamamen 9 myń tonna sút tapsyrylatyn bolady. Bul kólemge keler jyly qol jetkizý josparlanyp otyr. О́nim Qaraǵandy oblysy men Astana qalasynyń sút óńdeý kásiporyndaryna jetkiziletin bolady.
Jańa kásiporynnyń ashylýynda oblys ákimi Ermaǵanbet Bólekpaev aýyl turǵyndaryn quttyqtady.
– Búgin biz zamanaýı sút-taýar fermasyn ashýdamyz - ol tek jańa óndiristik býynǵa ǵana emes, aýyldaǵy ekonomıkalyq belsendiliktiń naǵyz ortalyǵyna aınalatyn mańyzdy nysan. Munda shamamen 60 jumys orny qurylady. Biraq eń mańyzdysy – jastardyń týǵan jerinde qalý, jumys isteý, damý jáne laıyqty tabys tabý múmkindigi. Dál osyndaı jobalar aýyldyń jańa ekonomıkasyn qalyptastyrady dep senemin. Jumys bar jerde mektep, balabaqsha, tolyqqandy ómir bolady, – degen óńir basshysy jobany iske asyrýǵa qatysqandardyń barlyǵyna alǵys aıtty.
STF qurylysy 2023 jyldan bastap júrgizildi. «Ramadan MF» JShS mal sharýashylyǵyn damytý jónindegi dırektordyń orynbasary Arman Nurjanov qazirgi ýaqytta golshtın tuqymdy sıyrlardyń birinshi legin satyp alǵanyn habarlady. Ol álemdegi eń sútti sıyrlardyń biri retinde tanymal.
Shtat qazirdiń ózinde mamandarmen jasaqtalǵan. Jumysshylardy qabyldaý kezinde jergilikti turǵyndarǵa basymdyq berilgen.
– Bizdiń aýdanda osyndaı úlken sút-taýar fermasynyń ashylǵany qýantady. Buryn barlyq aýdan táýligine 27 tonna sút beretin bolsa, endi bir ferma sonsha beredi. Munda bári bir alańda júzege asyrylǵan. Azyq bazasy quryldy. Jańa jumys oryndary paıda boldy. Bul bıznesmender óz moınyna alǵan áleýmettik jaýapkershilikti bildiredi, – dep atap ótti Qaraǵandy oblysy men Nura aýdanynyń qurmetti azamaty Georgıı Prokop.
Jalpy, joba oblystyń agrarlyq sektoryn damytýǵa oń áser etedi.