Elimizde ekologııalyq jaǵdaıdy jaqsartýda zamanaýı ári qoljetimdi ozyq tehnologııalar engizilip otyr. Osy kúni Qyzylorda qalasynda polıseıler qaýipsizdikti qamtamasyz etý, qoǵamdyq oryndardy lastaý faktilerin anyqtaýda Jedel basqarý ortalyǵyndaǵy 272 beınebaqylaý kamerasynyń kómegine júginedi.
Departament josparynda aldaǵy ýaqytta ekologııalyq quqyq buzýshylyqty boldyrmaýǵa múmkindik beretin kameralar jelisin kóbeıtý bar. Jyl basynan beri polıseıler atalǵan baǵytta 5508 ákimshilik quqyq buzýshylyqty anyqtapty.
Polısııa basqarmasy Jedel basqarý ortalyǵynyń 40 dana beınebaqylaý kamerasyna pılottyq rejımde jańa júıe ornatyldy. Bul beınebaqylaý kameralarynyń beıne aǵynyn óńdep, taldaýǵa múmkindik beredi.
«Jyl sońyna deıin oblys ákiminiń tapsyrmasyna sáıkes, turǵyndardyń qaýipsizdigi men qala tazalyǵyn qamtamasyz etý maqsatynda 1400 beınebaqylaý kamerasy ornatylyp, jasandy ıntellektisi bar jańa júıe arqyly qoǵamdyq oryndardy lastaý faktisin avtomatty túrde anyqtaý fýnksııasy tolyq iske qosylady», deıdi Qyzylorda oblysynyń Polısııa departamenti bastyǵynyń orynbasary Sábıt Ibadýlla.
Byltyr elimizde alǵash ret oblys ákimi qoldaýymen barlyq 7 aýdan ortalyǵyna 539 beınebaqylaý kamerasy ornatylyp, aýdandyq polısııa bólimderine jańadan kishi jedel basqarý ortalyqtary qoldanysqa berilgen. Alda bul baǵyttaǵy jumystar jandana bermek.