Elimizde konteınerlik tasymal kóleminiń birneshe esege artýyna Transkaspıı kólik dáliziniń damýy yqpal etip, saladaǵy negizgi faktorǵa aınaldy. Bul týraly «KTZ Express» AQ bas dırektorynyń orynbasary Aıbek Qapar ESE ASIA-2025 II Halyqaralyq kólik forýmynda aıtty, dep habarlaıdy Egemen.kz.
О́tken jyly osy Transkaspıı baǵytymen júretin konteınerlik poıyzdar sany aldyńǵy jylmen salystyrǵanda rekordtyq ósim kórsetti. Burnaǵy jyly 11 poıyz bolsa, byltyr olardyń sany 358-ge jetken. Bul kórsetkish 303 ese artqanyn kórsetedi.
«Bul – biz teńiz bóliginen ózimizge tartyp alyp, shoǵyrlandyrǵan kólemder. Negizinen ımporttar (Ázirbaıjan, Grýzııa, Túrkııa). Naqtyraq aıtsaq, bul kólemniń shamamen 60%-y – Ázerbaıjan ımporty. Buryn bul tasymaldar teńiz arqyly júzege asyrylatyn edi», dedi A.Qapar.
Sondaı-aq ol qazirgi kezde, ásirese Qytaı baǵytynda tasymal kóleminiń jetkiliksizdigi seziletinin tilge tıek etti. Bastapqyda naýryz ben sáýir aılarynda ósim bolady dep kútilgenimen, ázirge bul boljam oryndalmaǵan.
«Qazirgi tańda kólemder tolyq qalpyna kelmedi. О́tken jyly barlyq tranzıttik baǵyttar boıynsha ósim boldy – 1 mln 395 myń JFE (jıyrma fýttyq ekvıvalent), bul 2023 jylmen salystyrǵanda 9%-ǵa kóp. Bıyl bul kórsetkish tómendep keledi, degenmen biz kólemniń artýyn kútip otyrmyz. Bastapqyda ósimdi naýryz-sáýir aılarynda kútken edik, alaıda qazirgi kúni ol qalpyna kelgen joq. Sondyqtan endi mamyr aıynda artady dep úmittenemiz. Biz kólemniń tómendeýin Transkaspıı baǵyty boıynsha da baıqap otyrmyz. Qańtarda jaqsy kórsetkish boldy – 56 poıyz, naýryzda – 16, al sáýirde – 10 paıyz», dedi spıker.