ORAL. 20 maýsym. Batys Qazaqstan oblysynyń ortalyǵy – Oral qalasynda eldi eleń etkizgen urlyq boldy. Naqty aıtsaq, oblystyq ishki ister departamenti ákimshilik polısııa basqarmasynyń ǵımaratynda «Sberbank»-tiń termınalynan aqsha urlandy. Atalǵan termınal jergilikti júrgizýshilerdiń aıyppul tóleýi úshin ornatylǵan. Bul týraly egemen.kz tilshisi habarlady.
Oqıǵa 18 maýsymnan 19-yna qaraǵan túnde bolǵan. Urylar termınaldy syndyrý arqyly ishindegi aqshany qoldy etken. Polısııa qyzmetkeriniń aıtýynsha, urlyq týraly tańerteń jumysqa kelgen kezde belgili bolǵan. Atalǵan basqarma qyzmetkerleri jumysqa kelgen kezde termınaldyń bet jaǵy synǵanyn baıqaǵan eken.
Nazar aýdarar jaıt, apparat turǵan bólmege túngi mezgilde kirý múldem múmkin emes. Sebebi, syrtqy esik metall esikpen jáne tormen jabylady. Tipti terezelerine de dál sondaı metall torlar ornatylǵan. Odan bólek, bólmege basqarmanyń bas ǵımaraty arqyly kirýge bolady. Alaıda, ol jaqta da metall esik tur.
Ázirge bul urlyq týraly oblystyq ishki ister departamenti naqty túsinikteme bergen joq.
Temir Qusaıyn.
Derek: egemen.kz.
Sýret: uralskweek.kz.