Búgin Májiliste kórnekti memleket qaıratkeri, Qazaq KSR Joǵarǵy Keńesi Prezıdıýmynyń tóraǵasy, KSRO Joǵarǵy Keńesi Prezıdıýmynyń tóraǵa orynbasary Sattar Nurmashuly Imashevtiń týǵanyna 100 jyl tolýyna arnalǵan konferensııa ótti, dep jazady Egemen.kz.
Is-sharaǵa S.Imashevpen birge eńbek etken burynǵy áriptesteri, ár jyldardaǵy Parlament depýtattary, tanymal memleket jáne qoǵam qaıratkerleri, sondaı-aq mereıtoı ıesiniń týystary men jaqyndary qatysty.
Konferensııa barysynda qatysýshylar S.Imashevtiń saıası murasyn, memlekettik qurylystyń, partııalyq júıeniń damýyna qosqan úlesin, respýblıkanyń zańnamalyq negizin qalyptastyrýdaǵy rólin jáne onyń qazirgi zaman talaptary aıasyndaǵy mańyzdylyǵyn talqylap, estelikterimen bólisti.
Aıta ketsek, Sattar Nurmashuly 1925 jyly qazirgi Atyraý oblysynyń Qurmanǵazy aýdany Birlik aýylynda dúnıege kelgen. 1944-45 jyldary Ekinshi dúnıejúzilik soǵysqa qatysqan. Odan keıin memlekettik qyzmette eńbek etti. 1984 jyly 22 aqpanda Almaty qalasynda qaıtys boldy.
Jıynda sóz alǵan Májilis depýtaty Dúısenbaı Turǵanov S.Imashevtiń «Tulǵa» dep ataýǵa laıyq azamat bolǵanyn atap ótti. «Sebebi, osyndaı kisiler qaı jerde qandaı qyzmet atqarsa da, jaýapkershiligimen adamgershilik, parasattylyq qasıetterimen tarıhta óziniń izin qaldyrady. Onyń ómir joly – zamannyń aınasy. Ol keńestik Qazaqstannyń aıaqqa turýyna, búgingi táýelsiz Qazaqstannyń negizi bolǵan irgetasty qalyptastyrýǵa zor úles qosty» dedi ol.
Eline ólsheýsiz eńbek etken qaıratkerdiń ózge de jetistikterin eske salǵan depýtat Almaty qalasyndaǵy ózi turǵan úıde áli kúnge eskertkish taqta ornatylmaǵanyn qynjyla jetkizdi. Mundaı iri tulǵanyń umytylyp ketýine jol bermeýimiz kerek ekenin aıtty.
Konferensııa qorytyndysy boıynsha qatysýshylar qarar qabyldady. Onda Úkimetke S.Imashevtiń ǵylymı jáne saıası murasyn zerdeleýdi jáne nasıhattaý, ǵylymı eńbekteri men ol týraly estelikter jınaǵyn, muraǵattyq qujattar jınaǵyn shyǵarý, onyń qyzmeti týraly materıaldardy Qazaqstan tarıhy boıynsha bilim baǵdarlamasyna engizý, Atyraý oblysy Qurmanǵazy aýdanyndaǵy Birlik aýylyn S.Imashevtiń esimimen qaıta ataý, Astana men Almaty qalalaryndaǵy bir-bir kóshege onyń esimin berý, sondaı-aq osy qalalardaǵy bir-bir mektepke de esimin berý, elimizdiń birqatar ýnıversıtetiniń tarıh fakýlteti stýdentteri úshin S.Imashev atyndaǵy memlekettik stıpendııalardy qurý jáne Almatydaǵy ózi turǵan úıge eskertkish taqta ornatý týraly usynystar aıtylǵan.