Kókti ańsaǵan jaraly aqqý

Byl­tyr topshysy synǵanda qanaty­nan qan saýlap jatsa da qaıta ushpaq bolyp alasurǵan. Tóbesinen birneshe ret aınalyp ótip, aqyry uzaı-uzaı kók­ke sińip ketken bir top  qazdyń sońy­nan janushyra júgirgenin ǵana emis-emis biledi. Al qystaı ózi qamalyp jatqan tar qapasqa qalaı túskeni esinde joq.    

Kúzdiń qara sýyǵynda usharǵa qanaty bolmaı ólimshi bolǵan qus erkesin meıirimdi jandar jyly jerge panalatyp, aýa raıy jylynǵan soń, tabıǵat aıasyna bosatqan.

«Kúzde balalarym kólikpen kele jatqanda, jalpyldap jolǵa shyqqan ǵoı. Bir jaq qanaty qanǵa boıalypty. Bul qus qatty ushyp kele jatyp ne baǵanǵa, ne elektr symyna soǵylǵan nemese túlkige jem bola jazdaǵan bolý kerek. Qystaı jyly jerge qamap, jem-sýyn berip baqtyq. Qaz, úırek sııaqty emes, qolǵa úırenbeıdi eken. Aldyndaǵy jemin jańalaıyq desek, qanatyn kótere kerip ysyldap jolatpaı aıbat shegip turyp alady. Bul endi taǵy qus qoı. Qansha mápelep kútseń de adamǵa baýyr baspaıdy eken.  Tabıǵat aıasynda erkin ósken qusqa jemde turý – tar qapasqa qamalǵanmen birdeı ǵoı. Kólge erkine jibersek te, anda-sanda syrtynan baqylap qoıamyz. О́tkende janyna alty aqqý qonǵan. Birneshe kúnnen soń olar ushyp ketti de, bul qalyp qoıdy. Esilge aparyp, mal dárigerine de kórsettik. Dáriger bul qus endi usha almaıdy dedi. Bul aqqýǵa qus álemine janashyr ornıtolog mamandardyń qamqorlyǵy kerek. Bálkim, sol kisiler emdep kórer, tipti bolmasa, zoopark sııaqty mekemelerge ótkizer», deıdi jaraly aqqýdy qystaı baǵyp shyqqan qala turǵyny Bolat Ábdibekov.

Qazir jaraly aqqý aıdyn kóldi erkin sharlap, azyǵyn ózi taýyp júr. Alaıda alty aıdan soń qaharyn súıretip qys kelse, kúni ne bolady, belgisiz. Bolat aǵa «Eshkimnen qaıyr bolmasa, taǵy bir qystatyp shyǵarmyn» dep otyr. Alaıda aýqymy shamamen 200 gektar bolatyn aıdynda jalǵyz júzgen kıeli qus ońaılyqpen ustata qoıar ma eken?

Qostanaı oblysy