Qazaqstannyń barlyq óńirinen kelgen 350 óndirýshi óz ónimin Astanadaǵy «Ulttyq ónim» VIII otandyq óndirýshiler kórmesinde usyndy.
EKSPO halyqaralyq kórme ortalyǵynda bastalǵan segizinshi jyl saıynǵy kórmede qazaqstandyq óndirýshiler tamaq, jeńil, hımııa ónerkásibi, mashına jasaý, jabdyqtar, zergerlik buıym men basqa da myńdaǵan taýar túrin usyndy. Ekspozısııaǵa qatysqan barlyq kásiporynǵa elimizdegi shaǵyn jáne orta bızneske qoldaý jasaıtyn negizgi qarjy ınstıtýty «Damý» qory qarjylaı jáne basqa da kómek kórsetti.
«Ulttyq ónim» segizinshi kórmesi – otandyq kásipkerlikti damytýdyń eń jaqsy dáleli men kórinisi. О́ndirýshiler elimizdiń ishki naryǵyndaǵy ustanymyn nyǵaıtyp, eksportqa shyǵýda. Shetelde tanymal brendke aınalyp jatyr. Al shaǵyn jáne orta bıznesti memlekettiń qoldaýy tek kúsheıe bermek. Bıyl ekonomıkanyń naqty sektoryn jedel damytýǵa bet burdyq. Memleket aqparattyq tehnologııa, logıstıka, týrızmge, tamaq ónimin, qurylys materıalyn óndirýge, mashına jasaý, jeńil jáne hımııa ónerkásibi sııaqty basym salalardaǵy ShOB ınvestısııalyq jobalaryna ashyq tapsyrys jarııalady. Bul baǵytta jan-jaqty qoldaý kórsetiledi», dep atap ótti kórmeniń ashylýynda Premer-mınıstrdiń orynbasary – Ulttyq ekonomıka mınıstri S.Jumanǵarın.
Kórmede as úı plıtalary, jeldetkish, medısınalyq jabdyqtar, transformatorlar, quramajem, chemodandar, toqyma buıymdary, qurylys materıaldary, antıseptıkter, kıim, aıaqkıim jáne basqa da suranysqa ıe taýarlar usynylǵan. Qatysýshylardyń biri zararsyzdandyrý jáne jýý quralyn óndirýshi «Avrora» óndiristik kesheni» JShS naryqta 15 jyldan beri jumys istep keledi. Munda kosmetıkalyq ónimniń 40, turmystyq hımııanyń 55, zararsyzdandyrý quralynyń 80-nen astam túri bar.
«Biz ónim óndirýde tıimdilikke, qaýipsizdik pen taýardyń tym qymbat bolmaýyna basa nazar aýdaramyz. Bizden ydys jýýǵa arnalǵan sabyn, suıyq sabyn, áınek jýýǵa, as úıge, kir jýýǵa arnalǵan turmystyq hımııany satyp alýǵa keńes beremiz. Biz jelini únemi jańartyp otyramyz. Jańa ónimderdiń arasynda úı men keńsege arnalǵan hosh ıisti dıffýzorlar bar. «Booboo» brendimen balalarǵa arnalǵan ónimderdiń san alýan túrin shyǵarýdamyz. О́nimderimiz Qazaqstandaǵy saýda jelilerinde, marketpleısterde jáne taıaý shetelderde keńinen usynylǵan», dedi «Avrora» óndiristik kesheni» JShS óńirlik dırektory Ermek Erkinov.
2024 jyly «Báıterek» holdınginiń sýbsıdııalaý jáne kepildik berý quraldary arqyly Úkimet bıznesti qoldaý baǵdarlamalaryn iske asyrýǵa 336 mlrd teńge bóldi. 2,7 myń jobaǵa 254 mlrd teńge jeńildetilgen nesıe berilse, jalpy 29,5 myń joba 1,7 trln teńgege memlekettiń qoldaýyna ıe boldy. Bul sharalar 9,7 myń jumys ornyn ashýǵa, 25,4 trln teńgeniń ónimin shyǵarýǵa, 1,7 trln teńge salyq túsimine múmkindik berdi. Nátıjesinde, 2024 jyly ShOB sektorynda jumyspen qamtylǵandar úlesi halyqtyń 48%-na tıesili bolsa, IJО́-ge qosylǵan úles shamamen 40%-dy quraıdy.