TARAZ. 20 maýsym. Jambyl oblysy ákimdigi jáne «Nur Otan» partııasy oblystyq fılıalynyń qoldaýymen, ál-Farabı atyndaǵy Qazaq ulttyq ýnıversıtetiniń jýrnalıstıka fakýlteti jáne «Fotoóner» qoǵamdyq birlestiginiń uıymdastyrýymen Jambyl oblysynda «Qazaq handyǵynyń 550 jyldyǵyna arnalǵan fotoekspedısııa ótkizilýde. Bul týraly egemen.kz tilshisi habarlady.
Soǵan sáıkes ekspedısııa músheleri baspasóz máslıhatyn ótkizdi.
«Ult tarıhyn urpaqtan-urpaqqa jetkizýde Qazaq handyǵynyń 550 jyldyq merekesiniń mańyzy zor. Tarıhymyzdy taný – fotoshejiresiz múmkin emes. Osyǵan oraı uıymdastyrylǵan fotoekspedısııanyń maqsaty – Jambyl oblysynyń kóne tarıhı jerlerin, sonyń ishinde búgingi kúni, respýblıka boıynsha mańyzy zor Kereı men Jánibek handardyń tuńǵysh handyq qurǵan Qozybasy aımaǵyn, Qoraǵaty, Ańyraqaı dalasy men Han taǵy oryndaryn fotoǵa túsirý», – deıdi bul jóninde QazUÝ jýrnalıstıka fakýltetiniń dekany Saǵatbek Medeýbekuly.
Sondaı-aq, «Fotoóner» birlestiginiń tóraǵasy Asylhan Ábdiraıym ekspedısııa nátıjesinde túsirilgen fotosýretterden Almaty qalasynda, ýnıversıetette jáne memlekettik deńgeıde josparlanǵan Taraz qalasyndaǵy saltanatty mereıtoıda kórme ótkizý kózdelýde ekenin aıtty.
Sonymen qatar, bul túsirilimder keler jyly Táýelsizdigimizdiń 25 jyldyǵyna oraı memlekettik tapsyryspen jaryq kóretin «Qazaq fotoshejiresi – tarıh, derek, óner» atty fotoalbomǵa enetin bolady. Bul sharalar atalǵan tarıhı kezeńde, elimizde keler urpaqty otansúıgishtik rýhta tárbıeleýge, budan bólek týrızm salasynyń damýyna úlken úles qosady.
Oralhan Dáýit.
Derek: egemen.kz.
Sýret: Aqádil Rysmahan.