Memlekettik keńesshi Erlan Qarınniń tóraǵalyǵymen Qazaqstan Respýblıkasynyń IýNESKO jáne ISESKO isteri jónindegi ulttyq komıssııasynyń kezekti otyrysy ótti.
Is-sharaǵa tıisti mekemelerdiń ókilderi, sondaı-aq Qazaqstandaǵy IýNESKO komıtetteri men qaýymdastyqtarynyń basshylary qatysty.
Jıynda IýNESKO jáne ISESKO uıymdarymen aradaǵy yqpaldastyqty damytýǵa qatysty basymdyqtar men josparlar talqylandy. Erlan Qarın Memleket basshysynyń IýNESKO-men yntymaqtastyq máselelerine erekshe nazar aýdaratynyn aıtyp, onyń tapsyrmalaryn oryndaýdyń mańyzyna toqtaldy.
IýNESKO uıymy ótken jyldyń sońynda qazaqtyń biregeı salty – «Betashardy» Adamzattyń materıaldyq emes mádenı murasynyń reprezentatıvtik (úlgili muralar) tizimine engizgen edi. Osy rette Ulttyq komıssııa músheleri uıymnyń bul sheshimin erekshe yqylaspen qabyldady. IýNESKO-nyń Almatydaǵy О́ńirlik keńsesiniń basshysy Amır Pırıch Memlekettik keńesshi Erlan Qarınge «Betashardyń» atalǵan tizimge engeni týraly túpnusqa sertıfıkatty tabys etti.
Sondaı-aq otyrysta Qazaqstannyń muraǵattyq jáne tarıhı-qujattyq materıaldaryn IýNESKO-nyń «Álem jady» atty halyqaralyq tizimine engizýge qatysty jumystardy jandandyrý qajettigine nazar aýdaryldy. Mysaly, 14 jyl úzilisten keıin bıyl sáýir aıynda osy tizimge «Handar shejiresi» qoljazbasy engizildi.
Basqosýda aldaǵy is-sharalarǵa qatysty máseleler de qarastyryldy. Atap aıtqanda, IýNESKO shtab-páterinde Nurǵısa Tilendıevtiń 100 jyldyq mereıtoıyn atap ótý jáne Samarqand qalasynda ótetin IýNESKO-nyń 43-i Bas konferensııasyna daıyndyq jumystary talqylandy.